3 сакавіка ў працяг добрай традыцыі адзначаць гадавіну першай летапіснай згадкі пра Мінск Музей гісторыі Мінска запрашае на лекцыю «Пад правам магдэбургскім».
Дата: 3 сакавіка
Час: 18.00
Месца: гарадская ратуша, пл. Свабоды, 2а, Мінск
Лекцыя прысвечана гісторыі Мінска ў XVII–XVIII стагоддзях падчас дзеяння магдэбургскага права на беларускіх землях. Сваімі нарысамі з гісторыі Мінска падзеляцца знакамітыя гісторыкі, археолагі і краязнаўцы.
Надзея Палтаржыцкая, супрацоўніца Інстытута гісторыі НАН Беларусі, звернецца да ўнікальных дакументаў XVII–XVIII стагоддзяў — магістрацкіх кніг, каб расказаць аб структуры і штодзённых справах мінскага магістрата, галоўнага органа гарадскога самакіравання.
Няшмат людзей ведае, што разам з магістратам у Мінску існаваў яшчэ адзін орган самакіравання — Рада гмінных мужоў, якая таксама збіралася ў ратушы. Аляксандр Доўнар, загадчык аддзела спецыяльных гістарычных даследаванняў Інстытута гісторыі НАН Беларусі, падзеліцца дэталямі таго, як паўнамоцтвы былі падзелены паміж галінамі гарадской улады.
Археолагі Сяргей Тарасаў і Ірына Ганецкая раскажуць пра археалагічныя даследаванні архітэктурных помнікаў сучаснай плошчы Свабоды — Мінскай гарадской ратушы і Царквы Святога Духа.
Супрацоўнік Інстытута гісторыі НАН Алег Дзярновіч раскажа пра падзеі, праз якія ў Мінска з’явіліся свае нябесныя апекуны, адлюстраваныя і на гербе горада.
Спецыяліст па гістарычнай урбаністыцы Андрэй Кіштымаў распавядзе пра спецыфіку пражывання ў гарадах і асаблівасці развіцця гарадоў з моманту ўзнікнення магдэбургскага права на беларускіх землях да канца XIX стагоддзя на прыкладзе Мінска.
