Лекцыя Змітра Юркевіча «Паэт-самавук з Валожына» ў Мінску

У сераду, 23 красавіка, даследчык Зміцер Юркевіч чытае ў музеі гісторыі беларускай літаратуры лекцыю «Паэт-самавук з Валожына».

Гэтай лекцыяй музей працягвае праект «Па мячы і па кудзелі. Гісторыя сям’і — гісторыя асобы».

«Такія паэты маюць у нашай паэзіі літаральна маральнае значэнне як песняры з мазольнаю рукой, што ня толькі „з народу“, але і „сам народ“. Яго творы часам ня вельмі складныя, але чуецца ў іх сіла самае зямлі, непасрэдны павеў самога жыцця беларускай вёскі. Яны — натуральны адростак народнай паэзіі, казак і гутарак, легендаў і жартаў», — так ахарактарызаваў творчасць паэта-самавука Старога Уласа Максім Гарэцкі.

Сапраўднае імя літаратара — Уладзіслаў Сівы-Сівіцкі. Нарадзіўся ён 22 сакавіка 1865 г.

Адна з нямногіх матэрыяльных памятак аб ім на беларускіх землях — мемарыяльная шыльда на доме ў Валожыне, дзе паэт жыў працяглы час.

Ён актыўна друкаваўся ў перыёдыцы, а вось першы зборнік твораў быў выдадзены ажно ў 1990 г.

Разам з дочкамі Сівы-Сівіцкі адкрыў школы пісьменнасці для дзяцей, актыўна займаўся зборам фольклору. Іншыя звесткі пра пісьменніка досыць цьмяныя.

Але паступова, дзякуючы сучасным даследчыкам і іх карпатлівай працы, з’яўляюцца новыя драбочкі інфармацыі, супастаўляюцца факты і ўдакладняюцца звесткі.

Зміцер Юркевіч падзеліцца сваім бачаннем гісторыі Старога Уласа, аднаго з самых загадкавых творцаў памежжа ХІХ і ХХ стагоддзяў.

Квіткі — 8 рублёў.