8 – 20 снежня 2016
Галерэя сучаснага мастацтва “Ў”
Выставачны праект “Ад дэгуманізацыі да забойства: лёс псіхіятрычных хворых у Беларусі (1941–1944 гг.)”
Упершыню ў публічнай прасторы прагучыць сур’ёзная і маладаследаваная тэма, прысвечаная лёсу псіхіятрычных хворых у Беларусі ў гады Другой сусветнай вайны.
Выстава “Ад дэгуманізацыі да забойства: лёс псіхіятрычных хворых у Беларусі (1941–1944 гг.)” уяўляе сабой сістэматызацыю даследаванняў гісторыкаў і псіхіятраў Беларусі і Германіі.
У перыяд Другой сусветнай вайны на тэрыторыі Беларусі, як і ў іншых краінах Еўропы таго часу, былі знішчаныя пацыенты псіхіятрычных лякарняў. Памяць пра іх толькі апошнім часам робіцца важнаю часткаю агульнай памяці пра вайну. На выставе будзе прадстаўленая гісторыя ідэй і практык, якія прывялі да дэгуманізацыі пацыентаў псіхіятрычных лякарняў і да масавых забойстваў, пачынаючы ад распаўсюду ідэй еўгенікі, расавай тэорыі і канчаючы выкарыстаннем гэтых ідэй нацыстамі.
Выстава арыентаваная на ўсіх тых, хто цікавіцца гісторыяй Другой сусветнай вайны ў Беларусі, праблемамі медыцынскай этыкі і гістарычнай памяці.
Апроч асноўнай экспазіцыі прапаноўваецца праграма адкрытых лекцый і дыскусій.
Арганізатары выставы: Цэнтр публічнай гісторыі Еўрапейскага каледжу Liberal Arts у Беларусі пры падтрымцы фонду “Памяць, адказнасць і будучыня” (ФРГ).
Працоўная група праекту:
Алег Айзберг (БелМАПА), лекар-псіхіятр
Аляксей Братачкін (ECLAB), гісторык
Андрэй Замойскі (Інстытут ім. Фрыдрыха Майнэке пры Вольным універсітэце Берліну), гісторык
Васіль Матах, гісторык-архівіст
Арт-куратарка праекту: мастацтвазнаўца Аксана Жгіроўская (ECLAB)
Галерэя сучаснага мастацтва “Ў” радая запрасіць Вас на адкрыццё выставы 8 снежня а 19.00 па адрасе: Мінск, Незалежнасці 37А.
Уваход вольны
