НАРОДНЫЯ МСЦІЎЦЫ
Сюжэт фільма:
БССР, 1958г. Нечакана ў вёску на госці да свайго сябра прыязджае былы супрацоўнік “органаў”, Вусаў. Яго тут усе добра памятаюць па арэстах і забойствах перад вайной. Усе думалі, што ён загінуў, але ж не, жыве і відаць няблага – маладжавы, у добрым касцюме, з ардэнамі.
Чацьвёра вяскоўцаў збіраюцца каб абмеркаваць навіну за бутэлькай. Прыгадваюць старыя крыўды, забітых сваякоў.
І вырашаюць адпомсціць. А помста за такое можа быць толькі адна – смерць.
Слоган фільма: “Забыць нельга адпомсціць”.”ЗАБЫЦЬнельгаАДПОМСЦІЦЬ. Коску пастаў сам”
Мова: беларуская
Год: 2019
Прэм’ерны статус: нацыянальная прэм’ера, пракат і адпраўка фестывальных заявак пакуль не рабіліся
Жанр: драма
Узроставая катэгорыя: 12+
Рэжысёр: Аляксандар Меліхавец
Акторскі склад: Дзьмітрый Давідовіч, Арцём Курэнь, Ілля Ясінскі, Канстанцін Воранаў, Аляксандр Вафік, Паліна Дабравольская і інш.
Трэйлер:
Сайт фільма: мсціўцы.бел
СЕАНСЫ
к/з Мінск, малая зала (вул. Кастрычніцкая, 5)
2 сакавіка (субота): 14:00; 15:15
3 сакавіка (нядзеля): 14:00; 15:15
Кошт квітка 10 руб.
КВІТКІ
ByCard (кропкі продажу і сайт)
Каса к/з «Минск» (вул. Кастрычніцкая, 5)
Спраўка пра рэжысёра:
Аляксандар Меліхавец, 32 гады, нарадзіўся ў Менску
Ў якасці рэжысёра з 2009г. па 2018гг. здымаў музычныя кліпы, сацыяльныя ролікі. Мае ўзнагароды прэмій “Кліп-марафон”, “Street Awards”, Фестываля ва Фрайтбурге (Германия)
Фільмаграфія:
2011г. – “Максім Багдановіч. Жыў для Беларусі”, к/м ігравы фільм
2013г. – “Янка Купала. Жыў для Беларусі”, к/м ігравы фільм
2018г. – “Два гады таму”, дакументальны фільм
2018г. – “Паляшук” (паводле апавядання Ўладзімера Караткевіча), к/м ігравы фільм
2019г. – “Народныя мсціўцы” (паводле апавядання Васіля Быкава), п/м ігравы фільм
Фільм “Народныя мсіўцы” з’яўляецца дэбютам рэжысёра ў паўнаметражным кіно.
Факты пра фільм:
Фільм пачаў здымацца ў 2010г.
З 2010 па 2018г. фільм здымаўся тройчы (амаль цалкам) і з-за розных перашкодаў толькі на трэцы раз быў завершаны.
У фільме было тры абсалютна незалежных адзін ад аднаго склада актораў.
Здымачная група і склад актораў – цалкам беларускія.
Гукавое афармленне, агучка рабіліся на тым жа абсталяванні і тымі ж людзьмі, што і на валікіх праектах з бюджэтамі ў некалькі мільёнаў даляраў.
Для фільма кампазітарам Ягорам Дзыгуном напісаны арыгінальны саўндтрэк.
Узроставая катэгорыя фільма – 12+ гадоў
У чым адметнасці фільма?
Можна вызначыць некалькі складальнікаў. Гэта беларуская гісторыя/тэма. Гэта Васіль Быкаў. Гэта беларуская мова.
Арыгінальных беларускіх фільмаў на беларускай мове не было ў пракаце каля 25 год. І гэта даволі дзіўна і як для мяне асабіста, непрыемна. Яшчэ больш дзіўна тое, што такіх фільмаў не толькі няма ў пракаце, але і наогул не ствараецца. Пры тым, што на нацыянальны конкурс “Лістапада” было адпраўлена каля сотні заявак. То бок, у Беларусі ёсць каля сотні практыкуючых рэжысёраў (а іх болей, насамрэч), каля паўсотні прадусараў і тысячы прадстаўнікоў іншых кінапрафесій. А якія фільмы на беларускай мове вы ведаеце? Іх няма. Хацелася б падштурхнуць кінаграмадства да стварэння такога кіно – беларускага па мове і тэматыцы/праблематыцы.
Прыемна, што апошнім часам з’яўляюцца ініцыятывы з беларускай мовай у кінапракаце. Але пакуль гэта даволі вузкі нішавы сегмент. І гэта ўсёж-такі, не наша кіно. Я лічу, што пракат павінен быць калі не цалкам, то на 50% беларускамоўным (дубляж замежнага кіно), але больш значнай падаецца сёння задача стварэння свайго кінакантэнта, беларускага і па мове і па сэнсах. Па сутнасці, гэтыя напрамкі (дубляж замежных і стварэнне сваіх) павінны распрацоўвацца паралельна.
Па-сутнасці, кожная такая ініцыятыва – гэта маленькі народны рэферэндум, калі людзі могуць паказаць цікаўнасць да гэтая тэмы. Які паказвае, ці будзе ў нас развівацца беларуская мова ў кіно, ці будзе яна ў пракаце, ці будуць яго фінансаваць.
Якая асноўная прычына таго, што ў нас няма беларускага кіно (па мове, па тэмах)?
Зараз асноўная прычына, як не дзіўна, не палітычная, а эканамічная. Усе хочуць зарабіць: кінагрупа, прадусары, дыстрыбьютары, кінапракатчыкі, рэкламшчыкі. І ўсе адначасова ўпэўнены, што зарабіць на беларускамоўным і беларускім па тэмах кіно немагчыма ў прынцыпе. Прычым гэтая сітуацыя тычыцца і недзяржаўных структур і асобных людей і дзяржаўных.
З іншага боку, я бачу вялікую патэнцыйную цікаўнасць ад глядача. А ёй пакуль няма як рэалізавацца.
