Праект Аліны Дзеравянка «Brest HERstory» ў Познані

У сераду, 23 красавіка, у Познані прэзентуюць мультымедыйны праект Аліны Дзеравянка «Brest HERstory».

«Brest — HERstory» — гэта аўдыёдакумент пра гісторыю берасцейцаў часоў Другой сусветнай вайны, які паказвае жаночы погляд на гістарычныя падзеі.


Культурніцкая менеджарка Аліна Дзеравянка прадставіць свой праект, раскажа пра яго рэалізацыю і пакажа мультымедыйную прэзентацыю, якая датычыцца дакумента і дазваляе лепш зразумець яго тым, хто не можа наведаць Брэст асабіста.

Крыніцы — архіўныя матэрыялы і фота, апублікаваныя тэксты і сведчанні, дзённікі і інтэрв’ю.

Праект складаецца з серыі аўдыёспектакляў, карты горада з пазначанымі аб’ектамі, інфармацыяй пра месцы, а таксама фотаздымкамі і біяграфіямі ўдзельнікаў. Гераінь агучваюць жыхаркі Брэста.

Жаночая гісторыя ваеннага Берасця тэматычна і храналагічна падзелена на пяць частак.

Ёсць расповед польскай студэнткі Галіны Кірскай, у якой апісваюцца падзеі, якія адбываліся ў Брэсце ў перыяд з верасня 1939 г. па красавік 1940 г., а таксама падзеі, звязаныя з дэпартацыямі, якія праводзіліся ў 1939-1941 гг.

Таксама вы даведаецеся пра ўдзел жанчын у абароне Брэсцкай крэпасці (чэрвень 1941 г.), пра стварэнне і ліквідацыю яўрэйскага гета ў Брэсце (1941-1942 гг.), а таксама пра супраціўленне яўрэйскіх жанчын.

Апошняя частка прысвечана перыяду з 1941 года па сённяшні дзень і распавядае пра спадарожніц жыцця берасцейскіх камуністаў, практыкі іх догляду і выжывання, астарбайтэркі і інш.

«Brest HERstory» — праект не пра гераізм і вялікія бітвы, а пра бескарыслівы клопат і выратаванне дзяцей, дзяўчат і іншых людзей.

Выкарыстоўваючы тэхналогіі і мастацтва, каманда аўтараў раскрывае гісторыі нябачных людзей.