Прэзентацыя кнігі Віктара Карамазава
Пачатак: 25.06 (18:00)Канец: 25.06 (20:00)
Сядзіба Таварыства беларускай мовы
25 чэрвеня на сядзібе Таварыства беларускай мовы ў Мінску (вул. Румянцава, 13) адбудзецца прэзентацыя кнігі Віктара Карамазава.
У том выбраных твораў “Беларускага Кнігазбору” (67 выпуск выдавецкага праекта) увайшлі раман “Мастак і парабкі”, апавяданні і эсэ розных гадоў, а таксама публіцыстычнае слова пісьменніка па пытаннях беларускай літаратуры на мяжы двух стагоддзяў — дыялог з паэтам Леанідам Галубовічам.
Віктар Карамазаў
Анатоль Бараноўскі, народны мастак Беларусі, у грунтоўнай прадмове да кнігі адзначае:
“Пісьменнік будуе словам тое, што я, мастак, будую колерам. Мы спадарожнікі і аднадумцы, сябры па творчым пошуку. <…>
Віктар Карамазаў рэаліст. Бывае рэалістам жорсткім, як у «Аброчным крыжы», а бывае схільным да рамантызму, як у аповесці-эсэ «Глядзіце ў вочы лемуру». Формула рэалізму ў яго свая. Ён піша, як кожны рэаліст, з натуры, але натуру адчувае так, як скульптар адчувае ў руцэ кавалак гліны, аддаючы ёй цяплынь сваёй рукі, сваёй крыві”.
У імпрэзе акрамя самога аўтара возьмуць удзел:
Кастусь Цвірка, Генадзь Вінярскі, Сяргей Законнікаў, Анатоль Вярцінскі, Алесь Жук, Барыс Пятровіч, Галіна Каржанеўская, Леанід Галубовіч, Уладзімір Сіўчыкаў
Пачатак у 18.00. Уваход вольны.
Прэс-служба ГА “Саюз беларускіх пісьменнікаў”
