Re1ikt – сольны канцэрт у TNT Rock Club

Мінскі гурт Re1ikt адыграе першы ў 2014 годзе канцэрт у TNT Rock Club 26 студзеня.

У мінулым годзе ў жыцці каманды адбылося шмат важных і цікавых падзей. Першае месца і прыз глядацкіх сімпатый на фестывалі Rockowisko у Польшчы, перамога ў намінацыі «Героі году 2013» партала Tuzin.fm, прэзентацыя праекта агучкі першых нямых беларускіх фільмаў «Тузін.Немаўля» у межах міжнароднага кінафестывалю «Лістапад» і выданне трайнога DVD, удзел у шэрагу буйных опэн-эйраў у Польшчы, Украіне і Беларусі, з’яўленне відэакліпа на песню «Чаго ты, Лося…», вялікая колькасць канцэртаў у розных гарадах Беларусі і інш.

Сольны канцэрт 26 студзеня стане своеасаблівым падвядзеннем вынікаў 2013 года. Музыкі рыхтуюцца выканаць не толькі новыя песні з альбома, рэліз якога запланаваны на восень, але і лепшыя кампазіцыі з ранняга перыяда творчасці Re1ikt.

У бліжэйшы час гурт пераключаецца на актыўную працу над новым дыскам, у сувязі з чым часова спыніць канцэртную дзейнасць.

Сольны канцэрт гурта Re1ikt
26 студзеня, TNT Rock Club (Рэвалюцыйная, 9)
Пачатак: 21:00
Уваход: 40.000

Re1ikt – адзін з беларускіх гуртоў, якія стала канцэртуюць. Калектыў неаднаразова выступаў на фестывалях у Польшы, Літве, ва Украіне, на Беларусі і быў адзначаны шматлікімі ўзнагародамі.

На рахунку Re1ikt 3 студыйныя альбомы. Апошні на сёння дыск «Рэкі прабілі лёд» стаў бестсэлерам лэйбла “Вігма” і быў перавыдадзены ў 2012 годзе. Таксама ў арсенале Re1ikt 5 відэакліпаў і 2 live-DVD.

Цяпер Re1ikt рыхтуецца да запісу чацвёртага альбома.

Новая праграма ўжо была прэзентаваная ў розных краінах і на Радзіме. Матэрыял блізкі да такіх накірункаў як progressive rock, post rock, art rock і alternative rock. Сучасныя музычныя плыні Re1ikt спалучае з традыцыйным беларускім песенным фальклорам, робячы яго актуальным для слухачоў, якія шукаюць у музыцы нешта новае.