Сустрэча ў Кніжнай Шафе з Андрэем Хадановічам!
Пачатак: 13.09 (19:00)Канец: 13.09 (19:00)
Кніжная шафа
13 верасня ў “Кніжнай шафе” адбудзецца першая творчая сустрэча ў гэтым сезоне!
Наш госць – усім вядомы беларускі майстар слова: паэт і перакладчык Андрэй Хадановіч.
Творчая сустрэча будзе складацца з дзвюх частак:
Першая частка для дзяцей (19.00).Андрэй Хадановіч прачытае вершы Са свайго пэтычнага зборніка “Нататкітаткі”. Гэтая кніжка – першая спроба паэта пісаць для дзяцей. Зборнік атрымаўся такім натуральным, бо сітуацыі, апісаныя ў вершах, браліся з сапраўднага жыцця. У кнізе паэт апісвае прыгоды дзіцяці, знаёмыя ўсім бацькам, але робіць гэта настолькі незвычайна і віртуозна, што нават самыя звыклыя сітуацыі набываюць іншыя барвы: поўныя жыцця, вясёлых усмешак і радасці.
Другая частка сустрэчы (20.00) – ужо для дарослых. На ёй паэт пазнаёміць гасцей “Шафы” з творамі, якія ўвайшлі ў яго нядаўнюю кнігу вершаў “Цягнік Чыкага-Токіё”. Як зазначаў сам Андрэй Хадановіч, адметнасць гэтай кнігі – набліжанасць лірычнага героя да самога аўтара. Гэтым тлумачыцца шчырасць, якой прасякнуты ўвесь зборнік, дзе значную частку складаюць вершы-падарожжы і верлібры. Вандроўкі, што схілялі паэта да творчасці, таксама сапраўдныя, дарэчы. Вось што значыць натхняцца жыццём!
Андрэй Хадановіч – паэт, перакладчык, выкладчык літаратуры ў БДУ. Першая яго кніга выйшла ў 2002 годзе. Годам пазней ён пачаў актыўна друкавацца, выдаў некалькі зборнікаў запар, дзякуючы якім знайшоў мноства прыхільнікаў сярод чытачоў. Зараз Андрэй Валер’евіч з’яўляецца безумоўным аўтарытэтам ў літаратурных суполках розных краін, бо яго творы перакладаюцца на многія мовы. Паэт сам нямала вандраваў па свеце, наведваў розныя кантыненты. Так і ў паэзіі, Андрэй Хадановіч заўсёды адкрыты да новых цікавых эксперыментаў, што прываблівае і натхняе ў яго творчасці.
Сустрэча адбудзецца 13 верасня а 19-й, уваход вольны.
Чакаем вас па адрасе: праспект Дзяржынскага 9, “Кніжная Шафа” (уваход са двара).
