У сераду, 8 сакавіка, Нацыянальны цэнтр сучасных мастацтваў ладзіць «Свята пачуццяў і рэзалюцый». Так-так, з нагоды Міжнароднага жаночага дня.
Дата: 8 сакавіка
Час: з 15.00 да 20.00 (час мясцовы)
Месца: НЦСМ, вул. Някрасава, 3, Мінск
Вось якая праграма:
Напачатку свята, а 15-й — аглядная экскурсія па адной з самых вясновых выстаў «Джаз! Каты! Вясна!», а пасля — творчасць і рэлаксацыя.
У 16:30 адбудзецца лекцыя «Мода на прыгажосць: факты гісторыі». Лектарка — Алеся Іназемцава, кандыдатка мастацтвазнаўства.
Вы даведаецеся, як змяняўся вобраз жаночага ідэалу прыгажосці ў залежнасці ад палітычных умоў, рэлігійных ідэй і нават бытавых асаблівасцей той ці іншай гістарычнай эпохі.
Таксама ў 16:30 будзе майстар-клас па мастацкім калажы «Вобраз Грэцыі» ад дызайнеркі Дарыі Румянцавай, дзе вы паглыбіцеся ў архетыпы жаночых вобразаў Старажытнай Грэцыі: даведаецеся, у чым яны знайшлі сваё ўвасабленне сёння, а таксама зможаце стварыць незвычайныя яркія калажы з каляровай паперы, кардона і часопісных выразак.
Далей, у 17.30 — майстар-клас «Кветкі для Клары» ад мастака Руслана Сяргеева, на якім удзельнікі створаць арыгінальныя прынты кветак пры дапамозе трафарэтаў.
А 18-й пачнецца лекцыя Крысціны Паўлоўскай «Хлеб і ружы: гісторыя міжнароднага дня жанчын».
Клара Цэткін — гістарычная фігура, якая адыграла ключавую ролю ў барацьбе жанчын за свае правы ў ХХ стагоддзі. «Хлеба і руж!» — адзін з галоўных лозунгаў тагачасных актывістак, а што ж ён азначае, і як жанчыны змагаліся за раўнапраўе, вы зможаце даведацца на лекцыі.
У завяршэнне вечара — Dj-сэт.
Квіткі коштам 13 рублёў можна набыць у касе цэнтра альбо па спасылцы.
