Тэатр – мастацтва для абраных або для ўсіх і кожнага? Чым жывуць сёння і як стасуюцца са сваёй аўдыторыяй прафесійныя тэатры Магілёва, у якім кірунку развіваюцца? Ці патрэбны наогул гораду прафесійны дзяржаўны рэпертуарны тэатр, ці адпавядае яго цяперашні стан патрабаванням сучаснасці і запытам аўдыторыі? Тэатральнае жыццё горада значна актывізуецца ў сакавіку, калі праводзіцца Міжнародны маладзёжны тэатральны форум “Март-кантакт”. Чым жыве тэатральны Магілёў у астатні час, чаго яму не хапае? Паразмаўляем пра гэта на грамадскай дыскусіі ад “Будзьма беларусамі!”.
У Магілёве дзейнічаюць два прафесійныя дзяржаўныя рэпертуарныя тэатры – Магілёўскі абласны драматычны тэатр і Магілёўскі абласны тэатры лялек. Сёння ім даводзіцца балансаваць паміж камерцыйнымі мэтамі і мастацкімі задачамі, пры гэтым захоўваючы цэльнасць рэпертуарнай палітыкі, выконваючы сацыяльныя і асветніцкія функцыі. Прадстаўнікі абодвух прафесійных тэатраў Магілёва акрэсляць місію сваіх устаноў, агучаць надзённыя праблемы.
Што ж цікавага і адметнага могуць прапанаваць сваім гледачам тэатр драмы і тэатр лялек, запрашае высветліць 13 лістапада грамадская культурніцкая кампанія “Будзьма беларусамі!” на дыскусіі пад назвай “Тэатр у Магілёве: шлях да гледача”. Таксама паспрабуем разам з экспертамі адказаць на пытанне: Магілёў – тэатральны цэнтр або тэатральная правінцыя?
Гаворка будзе ісці ў трох кірунках:
– Сённяшні стан прафесійных тэатраў Магілёва. Наколькі эфектыўна яны працуюць? У які бок яны развіваюцца і як будуюць сваю рэпертуарную палітыку?
– Тэатр і яго аўдыторыя. Наколькі запатрабаванае сёння сярод жыхароў Магілёва тэатральнае мастацтва, ці адпавядае яно іх запытам і чаканням? Ці можа тэатр адначасова выконваць камерцыйныя і асветніцкія задачы?
– Перспектывы развіцця магілёўскіх тэатраў. Што можна зрабіць, каб ажывіць тэатральнае жыццё горада? Якія захады робяць тэатры, каб быць канкурэнтаздольнымі, запатрабаванымі, цікавымі і даступнымі для аўдыторыі?
Спікерамі ў дыскусіі выступяць:
– Саўлюс Варнас – галоўны рэжысёр Магілёўскага абласнога драматычнага тэатра.
– Уладзімір Андрэенка – дырэктар Магілёўскага абласнога тэатра лялек.
– Уладзімір Пятровіч – акцёр і рэжысёр Магілёўскага абласнога драматычнага тэатра.
У дыскусіі возьме ўдзел запрошаны знешні эксперт:
– Алена Мальчэўская – тэатральны крытык, журналіст, галоўны рэдактар часопіса “Полымя” (Мінск).
Запрашаем да дыялогу ўсіх зацікаўленых магілёўцаў – блізкіх і далёкіх ад тэатра. Паразважаем разам, які тэатр патрэбны гораду, чаго чакаюць гараджане ад тэатраў і, адпаведна – тэатры ад сваёй аўдыторыі.
Дата: 13 лістапада 2018 г.
Месца: г. Магілёў, канферэнц-зала гасцініцы “Губернская”, вул. Ленінская, 56/6
Пачатак: 18:30
Уваход вольны!
