У Мінск з сольным канцэртам едзе гурт Sciana. Берасцейцы выступяць на сцэне клуба Loft 30 мая ў фінальным канцэрце сэзону праекту “Жывы Тузін”. У вечарыне таксама возьме ўдзел “ар’ергарднае трыё” Tonqixod на чале з Уладзем Лянкевічам.
Імпрэза 30 мая атрымала назву ў гонар новай песні гурта Sciana “Новая хваля”, што была нядаўна прэзентаваная ў сеціве. Зараз берасцейцы сканчаюць працу над студыйным альбомам, а таксама здымаюць кліп на адну зь песень ды рыхтуюць цікавы дуэт. На сваім рэдкім канцэрце ў Мінску ў межах праекту “Жывы Тузін” яны прадставяць праграму з зусім свежых і вядомых твораў, якія цяпер гучаць у новых аранжыроўках. Sciana цяпер спалучае рок-гучанне з электроннай музыкай. “Гэта будзе наш фірмовы кактэйль з драйву, энергіі ды палескага задору, якога хопіць на ўсіх. Мы можам сказаць смела, што нам не сорамна за тыя творы, якія маем, бо мы выступаем за якасную беларускую, а значыць беларускамоўную, культуру”, – заяўляюць музыкі. Гэтым летам гурт будзе святкаваць ужо 14-ты год нараджэння. Іх песні неаднойчы ўздымаліся на першыя прыступкі ў чарце на “Тузіне Гітоў”. Сярод дасягненняў – перамога на “Басовішча-2003”, прыз, як найлепшаму рэгіянальнаму гурту на “Рок-Каранацыі-2006”, галоўны прыз на буйным польскім фэсьце “Rock Noca-2011”. Sciana дужа шанаваная ў Польшчы ды Ўкраіне, але ў Беларусі выступае даволі рэдка.
У канцэрце 30 мая таксама возьме ўдзел гурт Tonqixod, які прадставіць публіцы сваю дэбютную праграму. Лідар праекту Ўладзь Лянкевіч кажа, што граюць яны ў стылі “ар’ергард” і ўдакладняе: “У складзе нашай каманды тры чалавекі з вялікай разбежкай у густах і прэферэнцыях, што ў выніку выліваецца ў адметнае гучанне каманды. Я не вялікі тэарэтык, але можна сказаць, што ў самым шырокім сэнсе ў нас атрымліваецца арт-рок”. Гурт сабраўся два гады таму, але актыўна стаў выступаць толькі сёлета. Музыкі раяць слухаць іх менавіта ўжывую, бо “наяўныя дэмкі аніяк не перадаюць атмасферы жывога выступу з заўважным імправізацыйным элемэнтам”.
Весьці канцэрт «Жывы Тузін» па традыцыі будзе Алег Хаменка. Не абыйдзецца справа без падарункаў ад сяброў «Тузіна Гітоў» — кампаніі «Будзьма беларусамі».
30 мая (чацвер). 19.00. Loft cafе (вул.П.Броўкі, 22). Завяршальны канцэрт праекту “Жывы Тузін” у клюбным сэзоне 2012-2013
Tonqixod
прэзэнтацыя дэбютнай праграмы ад “ар’ергарднага трыё” Уладзя Лянкевіча
SCIANA
прэзентацыя EP “Новая хваля” + лепшыя і новыя песьні
Кошт квітка – 80 000 руб.
Квіткі можна набыць у касах KVITKI.BY і непасрэдна ў клубе перад канцэртам
Замовіць столік : +375 29 38 000 10
Іншыя пытаньні: + 375 29 687 20 93
