Урачыстая перадача ў дар жывапісных твораў Аляксандра Рубца

У рамках святкавання 80-годдзя Нацыянальнага мастацкага музея Рэспублікі Беларусь 22 лютага 2019 года а 11-й гадзіне ў Белай зале адбудзецца ўрачыстая перадача ў дар жывапісных твораў – пейзажаў «Асеція. Аланія. Даргава» і «Вяршыні Дангуз-Аруна» мастака Аляксандра Міхайлавіча Рубца, ганаровага члена Расійскай акадэміі мастацтваў, віцэ-прэзідэнта Творчага саюза мастакоў Расіі па Паўднёвай федэральнай акрузе, кіраўніка Стаўрапольскага рэгіянальнага аддзялення Творчага саюза мастакоў Расіі – грамадскай арганізацыі, якая аб’ядноўвае пятнаццаць тысяч прафесійных мастакоў па ўсёй Расіі.

Аляксандр Міхайлавіч Рубец нарадзіўся ў 1953 годзе ў горадзе Гродне, Рэспубліка Беларусь. Вучыўся ў Рэспубліканскай школе-інтэрнаце па музыцы і выяўленчым мастацтве ў Мінску. Скончыў Ленінградскае мастацкае вучылішча імя В. Сярова. Узнагароджаны залатым і сярэбранымі медалямі Расійскай акадэміі мастацтваў, медалём «Шувалава» Расійскай акадэміі мастацтваў, медалём «За заслугі перад Акадэміяй РАМ», медалём «Леанарда» Саюза дызайнераў Расіі, залатым медалём Творчага саюза мастакоў Расіі.

Актыўны ўдзельнік міжнародных і расійскіх мастацкіх выстаў.

Творы мастака знаходзяцца больш чым у дваццаці мастацкіх музеях Расійскай Федэрацыі, такіх як Музей сучаснага мастацтва (Масква), Музей-крэпасць «Нарын-Кала» (Дзербент), Мастацкі музей (Растоў-на-Доне), Нацыянальная карцінная галерэя імя Кадырава (Грозны), Гісторыка-краязнаўчы музей імя Шпакоўскага (Есентукі), Дзяржаўны музей-запаведнік М.Ю. Лермантава (Пяцігорск), Краявы музей выяўленчых мастацтваў (Стаўрапаль), а таксама ў прыватных калекцыях.