Вечар беларускай культуры

У аўторак, 5 снежня, мы чакаем нашых любімых гледачоў у тэатры, каб разам адкрыць новыя, для кагосьці – яшчэ нязведаныя, старонкі беларускай гісторыі і мастацтва. Роўна ў 18:15 мы запрашаем усіх стаць сведкамі без перабольшання ўнікальнай падзеі – у фае беларускага Вялікага будуць выстаўлены дзве цудатворныя іконы ХVII стагоддзя: «Маці Божая Пажайская» і «Мадонна з Немаўлём». «Гэтая выстава дае магчымасць не толькі ўбачыць непаўторныя творы беларускага іканапісу, але і прадстаць перад цудадзейнымі шэдэўрамі, пранікнуцца хараством вобраза нязгаснага святла…» – перакананы дырэктар Музея старажытнай беларускай культуры Барыс Лазука. Барыс Андрэевіч і адкрые выставу, раскажа, як заўсёды, дзіўна цікава гісторыі з’яўлення гэтых вобразаў і адкажа на ўсе пытанні, а яны, несумненна, узнікнуць пасля апавядання, якое не зможа не захапіць.

Працягнецца Вечар беларускай культуры ў вялікай зале тэатра: роўна ў сем гадзін вечара на нашай сцэне ажыве Магілёў XVII стагоддзя – у спектаклі «Сівая легенда». «Гэтая опера – адна з лепшых і найбольш арыгінальных ў Вялікім тэатры Беларусі» – пішуць музычныя крытыкі аб «Сівой легендзе» Дзмітрыя Смольскага, лібрэта да якой напісаў сам Уладзімір Караткевіч. XVII стагоддзе – час непрыступных замкаў, паляванняў, нобіляў, радавітых шляхціцаў… І ўсё ж такі гэта гісторыя – пра каханне, якое вышэй за ўсё і пра якое складаюцца легенды… 5 снежня на сцэне беларускага Вялікага – зоркі нашага тэатра: народныя артысты Беларусі Настасся Масквіна (Ірына) і Сяргей Франкоўскі (Раман), а таксама заслужаныя артысты рэспублікі Ўладзімір Громаў (Кізгайла), Аксана Волкава (Любка) і Алег Мельнікаў (Найміт). За дырыжорскім пультам – маэстра Андрэй Іваноў. (Дарэчы, Андрэй у пачатку лістапада стаў галоўным дырыжорам Растоўскага музычнага тэатра.)