Выстава «Графіка Германа Штрука»

31.01.2019 17:00 - 17:00 Нацыянальны мастацкі музей (вул. Леніна, 20) Бясплатнае

31 студзеня 2019 года а 17-й гадзіне ў Нацыянальным мастацкім музеі Рэспублікі Беларусь адкрыецца выстава «Графіка Германа Штрука», на якой будуць прадстаўлены графічныя работы вядомага нямецкага мастака Германа Штрука (18761944) з прыватнай калекцыі Уладзіміра Багданава (Мінск).

Аснову экспазіцыі складаюць 50 работ, створаных на тэрыторыі Беларусі, Літвы і Латвіі ў час Першай сусветнай вайны, калі Штрук служыў у германскай арміі на Усходнім фронце.

Выдатны майстар нямецкай гравюры Герман Штрук нарадзіўся ў 1876 годзе ў Берліне ў артадаксальнай яўрэйскай сям’і. Скончыў Берлінскую акадэмію мастацтваў, даволі хутка стаў вядомым як майстар літаграфіі і афорта, увайшоў у берлінскую мастацкую эліту, удзельнічаў у творчым аб’яднанні «Берлінскі Сецэсіён». Шмат падарожнічаў, пабываў у Даніі, Палестыне, Швейцарыі, Швецыі, Вялікабрытаніі, ЗША. Падчас кожнага падарожжа рабіў шмат замалёвак.

Штрук актыўна займаўся педагагічнай дзейнасцю, сярод яго вучняў – вядомыя нямецкія мастакі Ловіс Корынт (копія яго партрэта Штрука прадстаўлена на выставе), Уры Лесер, Макс Слефогт. У 1908 годзе Герман Штрук выпусціў кнігу «Мастацтва афорта», якая вытрымала некалькі выданняў і стала дапаможнікам для многіх пакаленняў мастакоў. Штрук унёс нямала новага ў мастацтва графікі, выпрацаваў уласную тэхніку, камбінуючы розныя прыёмы гравіравання, умеў гравіравать з натуры адразу на дошку, не робячы накідаў.

Сустрэча з Германам Штрукам адыграла значную ролю ў жыцці Марка Шагала. Яны пазнаёміліся ў 1922 годзе ў Берліне, куды Шагал прыехаў пасля таго, як пакінуў радзіму. З дапамогай Штрука Шагал авалодаў техникамі афорта і літаграфіі (да гэтага ён гравіраваннем не займаўся) і ўжо ў 1923 годзе стварыў серыю графічных ілюстрацый да сваёй аўтабіяграфіі «Маё жыццё». Партрэт Марка Шагала работы Штрука, створаны ў той перыяд, таксама прадстаўлены на выставе.

У гады Першай сусветнай вайны Штрук, будучы нямецкім афіцэрам і членам Яўрэйскага камітэта дапамогі Польшчы і Літве, аб’ездзіў занятыя нямецкімі войскамі тэрыторыі Польшчы, Літвы, Латвіі і Беларусі. Пры гэтым ён, як звычайна, рабіў замалёўкі ўсіх тых месцаў, што сустракаліся на яго шляху. Вынікам гэтай працы сталі графічныя альбомы «Замалёўкі Літвы, Беларусі і Курляндыі» (1916) і «Аблічча ўсходняга яўрэйства» (1920), выдадзеныя ў Берліне.

Аснову экспазіцыі гэтай выставы склалі гравюры, якія ўвайшлі ў альбом «Замалёўкі Літвы, Беларусі і Курляндыі». Гэта пейзажы гарадоў Беларусі, Літвы і Латвіі, бытавыя замалёўкі, партрэты мясцовых жыхароў розных прафесій і нацыянальнасцей.

Выстава будзе экспанавацца з 31 студзеня па 24 лютага 2019 года.


Вам можа быць цікава

Выстава Міхаіла Ляўковіча «Зачараванне плюс» у Віцебску

12.02.2025 17:00 - 30.03.2025 18:00 мастацкі музей (вул. Леніна, 32)

Выстава «Мода. Паміж прыгажосцю і прымусам» у Мінску

14.02.2025 18:00 - 13.04.2025 20:00 Нацыянальны цэнтр сучасных мастацтваў (пр-т Незалежнасці, 47)

Выстава «Джаз! Каты! Вясна!» у Мінску

21.02.2025 11:00 - 30.03.2025 20:00 Нацыянальны цэнтр сучасных мастацтваў (Някрасава, 3)

Naka ў Варшаве

29.03.2025 (18:30 - 21:30) Beer Station Praga (Ząbkowska 5)

Апошняе
на Budzma.org

чытаць яшчэ