У чацвер, 25 красавіка а 18-й, у Нацыянальным цэнтры сучасных мастацтваў адкрываецца выстава Ігара Кашкурэвіча «З Вечнасці ў Вечнасць».
Дата: 25 красавіка ў 18.00
Месца: НЦСМ, вул. Някрасава, 3, Мінск
Ідэя праекта гучыць як «дэкарацыі для суб’екта і аб’екта», і ўсе аб’екты ў чатырох залах маюць адзіную назву, якая абумоўлена гэтай ідэяй.
Асаблівае месца займае інсталяцыя-прысвячэнне бацьку мастака Арлену Кашкурэвічу і творчым асобам, якія адыгралі ролю ў станаўленні асобы Ігара Кашкурэвіча.
Экспазіцыя падзелена на чатыры тэмы:
Жывапісна-графічная інсталяцыя «Амажы — прысвячэнні Янке Купале, Фёдару Дастаеўскаму, Арлену Кашкурэвічу, Васілю Быкаву, Альгерду Малішэўскаму, Уладзіміру Стальмашонку, Васілю Шаранговічу, Алегу Сурскаму, Анатолю Анікейчыку і Міхаілу Савіцкаму».
Інсталяцыя «Рукапісы гараць», у аснове якой ляжыць жанр аўтапартрэта. Ключ да разумення гэтага жанру крыецца ў назве жывапіснага твору «Рукапісы гараць».
Скульптурна-графічная інсталяцыя «Час — Творца» складаецца з каменнага круга, які сімвалізуе працэс творчасці ў часе, і малюнкаў, якія з`яўляюцца партрэтамі скульптур.
Жывапісная інсталяцыя «Паверхні», дзе аўтар паказвае цыкл твораў, які ствараўся ім з пачатку 1980-х гг. Гэтыя работы ўвасабляюць у сабе ідэю гармоніі, перададзеную праз прапорцыю і рытм святла.
Кожны чацвер з 17:00 да 20:00 аўтар прысутнічае на выставе і гатовы да размовы з наведвальнікамі.
Ігар Кашкурэвіч — мастак-канцэптуаліст, адзін з заснавальнікаў інтэлектуальнага накірунку беларускага перформансу. «Жывая легенда» неафіцыйнага мастацтва 1980-х.
Выстава працягнецца па 25 траўня.
Уваход — па квітку ў Цэнтр.
