16 лютага ў Празе адкрываецца выстава «Беларускі фальклор» Руфіны Базлавай, вядомай дзякуючы сваім карцінам-вышыванкам, якія распавядаюць пра падзеі ў Беларусі.
Дата: з 16 лютага па 14 красавіка
Месца: галерэя «Artwall», набярэжная kpt. Jaroše a Edvarda Beneše, Прага
Адкрыццё выставы адбудзецца ў Скаўцкім інстытуце (Staroměstské náměstí 4/1) у 18.00 (час мясцовы). На адкрыцці выступіць беларускі музыка і актывіст Аляксандр Ясінскі.
Выстава «Беларускі фальклор» адлюстроўвае трывожную сітуацыю ў сучаснай Беларусі, прыгадвае масавыя пратэсты і жорсткія рэпрэсіі, збіццё, катаванні і зняволенні, але і апошнія падзеі — напрыклад, гуманітарны крызіс на беларуска-польскай мяжы.
Мастачка свядома працуе з прыёмамі, традыцыйна звязанымі з жаночай творчасцю. І ў змаганні з дыктатурай важную ролю адыгрываюць тысячы жанчын, якія бясстрашна пратэставалі супраць парушэнняў правоў чалавека і цяпер знаходзяцца ў вымушанай ссылцы, адбываюць пакаранні за сфабрыкаваныя злачынствы або жывуць пад пастаяннай пагрозай пераследу.
