Выставачны праект «Сустрэчы», прысвечаны першаму біёграфу Янкі Купалы
Пачатак: 06.09 (14:00)Канец: 30.09 (13:41)
Капыльскі раённы краязнаўчы музей
Дзяржаўны літаратурны музеі Янкі Купалы сумесна з Капыльскім раённым краязнаўчым музеем прадстаўляюць памяткі, якія раскрываюць асобу Льва Клейнбарта (1875–1950) — пісьменніка, публіцыста, журналіста, першага біёграфа Янкі Купалы.
З Песняром яго звязвалі агульныя сустрэчы ў Санкт-Пецярбургу, вынікам чаго сталася прыязнае сяброўства і рэалізаваныя творчыя задумы. Менавіта Леў Клейнбарт пазнаёміў паэта з мецэнатам Аляксандрам Ярэмічам, які дапамог ажыцявіць выданне кнігі «Шляхам жыцця».
«Беларусь не толькі ў яго думках, у яго пачуццях, але і ў кожным моўным звароце, кожным гуку яго верша... Паэзія яго адна з тых хваляў, якія неслі на сваім грабяні нацыянальны рух».
Леў Клейбарт пра Янку Купалу
Сярод рарытэтаў на выставе можна ўбачыць арыгінальныя здымкі Янкі Купалы і сям’і Клейнбартаў, перапіску паэта са сваім біёграфам, рэдкія выданні якія належалі абодвум героям сустрэч. Таксама будзе прадстаўлена адна з першых фундаментальных прац пра беларускую літаратуру «Маладая Беларусь» (1928), аўтарства Льва Клейнбарта. Наведвальнікі выставы даведаюцца і пра вядомых выхадцаў Капыля — пісьменнікаў Зміцера Жылуновіча (Цішкі Гартнага), Алеся Гурло.
Наведаць выставу можна да 30 верасня 2021 года ў Капыльскім раённым краязнаўчым музеі.
