Выстава «Мастацтва ў археалогіі», што працуе ў Нацыянальным мастацкім музеі, паказвае археалагічныя артэфакты з музейнай калекцыі і выклікае цікавасць гледачоў не толькі адметным экспанаваннем, але і тым, што прадметы, прадстаўленыя на выставе, можна знайсці як у падручніках гісторыі, так і ў кнігах па беларускаму мастацтву, піша reform.news.

Створкі крыжоў-энкалпіёнаў. Фота: сацсеткі

Насамрэч музей асобнай калекцыі археалогіі не мае. Аднак захоўвае каля 200 аб’ектаў, знойдзеных падчас археалагічных раскопак. Яны размешчыны ў аддзеле «Беларускае дэкаратыўна-прыкладное мастацтва». 

Грабень самшытавы. ХІІІ ст. Раскопкі Мінскага замчышча. 1958. Фота: сацсеткі

У асноўным гэта рэчы, якія былі знойдзены ў сярэдзіне мінулага стагоддзя на раскопках у Мінску і Ваўкавыску, але таксама і адносна нядаўнія археалагічныя прадметы.

Абразок Святы Мікалай і святы Стэфан. ХІІІ ст. Раскопкі Мінскага замчышча. 1957. Фота: сацсеткі

На выставу куратар і вядучы навуковы супрацоўнік аддзела старажытнабеларускага мастацтва Дзмітрый Моніч адабраў прадметы, якія маюць мастацкую каштоўнасць. Гэта амаль палова ўсёй калекцыі музея — каля 90 экспанатаў.

Шахматная фігура «Ладдзя». Пачатак ХІІ стагоддзя. Раскопкі «Шведскай гары» ў Ваўкавыску.1954. Шахматная фігура «Пешка». Пачатак ХІІ ст. Раскопкі «Шведскай гары» ў Ваўкавыску. 1954. Фота: сацсеткі

Унікальныя артэфакты маюць невялікі памер, таму для іх экспанавання былі падрыхтаваныя вітрыны з падсветкай, абсталяваныя павелічальным шклом розных дыяметраў.

Шпілька. III-IV стагоддзі. Фота: сацсеткі

Цэнтральным экспанатам выставы з’яўляецца невялікая каменная плітка з рэльефнай зааморфнай выявай. Яна мае дасканалую мастацкую апрацоўку, таму выява была змешчана на афішу.

Да найбольш каштоўных і старажытных помнікаў археалогіі ў калекцыі музея адносяцца артэфакты, выяўленыя ў 1950-я гады пры раскопках у Мінску пад кіраўніцтвам Эдуарда Загарульскага і Васіля Тарасенкі.

Створка трыптыха. Другая палова ХІ — пачатак ХІІ стагоддзя. Раскопкі «Шведскай гары» 1954. Фота: сацсеткі

Напрыклад, на Мінскім замчышчы былі знойдзены невялікія абразкі — з выявай Божай Маці і Святога Пятра, а таксама абразок з выявай Святога Мікалая і Святога Стэфана.

Падвеска. Шчучын. V-VII стагоддзі. Фота: сацсеткі

Таксама на выставе можна ўбачыць каменныя абразкі XIII стагоддзя, касцяныя шахматныя фігуры XIII стагоддзя, знойдзеныя падчас раскопак «Шведскай гары» ў 1954 годзе, двухбаковы самшытавы грэбень з выявай грыфонаў XIII стагоддзя.

Музей мае намер папаўняць калекцыю археалагічных прадметаў знаходкамі з металу, дрэва, каменя, якія маюць мастацкія якасці.

Выстава будзе працаваць да 6 красавіка.