Вялізны бел-чырвона-белы сцяг, выстава дзіцячых малюнкаў, чарга дзяцей рознага ўзросту перад імправізаванай сцэнай. Такую карціну маглі назіраць мінакі ўвечары 5 ліпеня ля летняга тэатра ў Батумі. Тут праходзілі вечар беларускай паэзіі і конкурс дзіцячых малюнкаў.

Мерапрыемства ладзілася ў межах дзён беларускай культуры, якія распачаліся 4 ліпеня майстар-класам па стварэнні традыцыйнай беларускай лялькі-мотанкі і так званым дранік-фэстам. Дранікі ў падарунак сябрам-беларусам гатавалі ўкраінцы разам з шэф-поварам рэстарана Adjika. А ствараць лялькі-мотанкі набралася столькі жадаючых, што арганізатарам давялося ладзіць адразу 2 майстар-класы замест аднаго.

Вяртаючыся да вечара 5 ліпеня, вядоўца Антон заахвочваў дзяцей і дарослых падыходзіць да мікрафона і чытаць вершы на беларускай мове або пра Беларусь. Выявілася, што маленькіх удзельнікаў свята заахвочваць асабліва не трэба. Нават невялічкая чарга сабралася з жадаючых выступіць.

Як прызнаўся, пазней у размове Антон, ён не чакаў, што будзе столькі жадаючых, і што дзеці так добра падрыхтуюцца.

«Добра, што ладзяцца такія мерыпрыемствы, яны насамрэч вельмі патрэбныя», — заўважыў Антон, гэта дае надзею, што ёсць будучыня ў Беларусі і ў беларускай мовы.

Са сцэны гучалі як вершы беларускіх «класікаў», так і вершы сучасных беларускіх паэтаў, у тым ліку і паэтаў-палітвязняў.

 Дзяўчынка Соф’я прычытала са сцэны некалькі ўласных вершаў

Ад вершаў плаўна перайшлі да песень. Спявалі дзіцячыя песенькі дзеткі разам з бацькамі. Адзін з удзельнікаў вечара прыемна ўразіў усіх прысутных шыкоўным выкананнем песняроўскай «Малітвы».

Мастацкі кіраўнік хору «Пілігрымы» (Мінск), а з нядаўняга часу і кіраўнік спеўных беларускіх гурткоў у Батумі, Любоў Шпакоўская разам з сяброўкай заспявала «Купалінку». Любоў распавяла гісторыю стварэння гэтай вядомай усім песні. Часцяком яе памылкова залічваюць да народных песень, а насамрэч народныя толькі словы, а мелодыя мае свайго аўтара — музыку да «Купалінкі» напісаў кампазітар Уладзімір Тэраўскі.

Любоў Шпакоўская (з мікрафонам)

Да беларускага свята далучыліся і ўкраінцы, прачытаўшы са сцэны некалькі вершаў на украінскай мове.

Побач са сцэнай зладзілі выставу дзіцячых малюнкаў на тэму «Любімае месца. Мая Беларусь». Некаторыя ўдзельнікі прынеслі малюнкі з сабой, але можна было намаляваць іх і непасрэдна на месцы. Для гэтага арганізатары адмыслова падрыхтавалі некалькі сталоў і ўсё неабходнае для малявання.

Тут жа можна было напісаць і лісты-пажаданні для Беларусі ды пачапіць іх побач з малюнкамі на выставу.

Вечар паэзіі скончыўся, але беларускія дні ў Батумі працягваюцца. Сёння, увечары, ля БДУ імя Шота Руставелі адбудзецца святкаванне Купалля. У праграме: купальскія песні ля возера, карагоды, народныя танцы і пляценне вянкоў.

Таксама ў межах тыдня беларускай культуры будзе творчая сустрэча з пісьменніцай Наталкай Харытанюк, прагляды беларускіх фільмаў, канцэрт беларускіх музыкаў ды іншыя мерапрыемствы.
Падрабязную праграму глядзіце тут. 

Чытайце яшчэ: Дні беларускай культуры па ўсім свеце: BELARUS MUST GO ON!