Ляўрэат Нобэлеўскай прэміі міру Алесь Бяляцкі стварае міжнародную праваабарончую фундацыю, які будзе працаваць ня толькі зь Беларусьсю. Бяляцкі застанецца старшынём праваабарончай арганізацыі «Вясна», аднак будзе займацца ў асноўным міжнароднымі справамі, паведамляе «Радыё Свабода».
Алесь Бяляцкі. Фота: Lokkby.media
«Мы будзем імкнуцца да паляпшэньня сытуацыі з унівэрсальнасьцю правоў чалавека, з рэгіянальнай бясьпекай, зь міжнародным правасуддзьдзем, зь мірабудаўніцтвам, якое асабліва важнае для нашага рэгіёну. Мы павінны нагадваць пра каштоўнасьць правоў чалавека, пра ўнівэрсальнасьць гэтых правоў, — што яны належаць усім, дзе б людзі ні жылі», — сказаў Нобэлеўскі ляўрэат Свабодзе.
Алесь Бяляцкі кажа, што хоча скарыстацца тымі магчымасьцямі, якія дае яму статус Нобэлеўскага ляўрэата.
«Фундацыя Алеся Бяляцкага» зарэгістравана і будзе базавацца ў Польшчы, але працаваць будзе як міжнародная арганізацыя і значная частка яе працы мае быць зьвязана з падтрымкай моладзі і моладзевых ініцыятываў, накіраваных на разьвіцьцё і захаваньне правоў чалавека ў розных краінах.
«Фінансаваньне фундацыі будзе ісьці фактычна так, як і ўсіх іншых няўрадавых арганізацый — з разнастайных праграм, якія падтрымліваюць глябальныя міжнародныя праекты і намаганьні грамадзкіх актывістаў».
Паводле Бяляцкага новая арганізацыя патрэбная, бо правы чалавека парушаюцца ў многіх краінах рэгіёну.
«Улічваючы крызісную сытуацыю ў нашых суседзяў, украінцаў, бо ідзе вайна Расеі супраць Украіны, улічваючы крызісную сытуацыю з правамі чалавека ў Беларусі, у некаторых іншых постсавецкіх краінах, дзе мы маем падобны рэжымы, — такія як Азэрбайджан, Узбэкістан. Вельмі хутка пагаршаецца сытуацыя з правамі чалавека ў Кіргізстане. Ёсьць вялікія праблемы ў Грузіі для працы няўрадавых арганізацый і для апанэнтаў існуючай улады».
Алесь Бяляцкі таксама патлумачыў, што ў новай фундацыі будуць працаваць грамадзяне розных краінаў, сярод якіх, маюць быць два ці тры цяперашнія праваабаронцы «Вясны».
