Сёння, каб упэўнена адчуваць сябе па жыцці, чалавеку неабходна валодаць шматлікімі навыкамі і ўменнямі, трымаць у галаве гігабайты карыснай інфармацыі, якая мусіць яшчэ і пастаянна абнаўляцца.
А для гэтага патрэбна навучыцца хутка і трывала запамінаць. Са школьных гадоў мы прывыклі да механічнага спосабу — калі патрэбныя звесткі мы паўтараем, пакуль яны не ўкладуцца ў памяці. Насамрэч гэта не надта эфектыўны ды надзейны метад.
У дадзеным артыкуле мы прапануем 5 падыходаў, абапіраючыся на якія, вы зможаце больш хутка і эфектыўна апрацоўваць і запамінаць патрэбную інфармацыю. Навучыце гэтаму сваіх дзетак — і ім стане значна прасцей спраўляцца са школьнай праграмай.
Фота: ua.depositphotos.com
1. Клопат пра свой мозг
Натуральна, калі мы хочам, каб наш мозг працаваў звышэфектыўна, мы мусім стварыць для яго спрыяльныя ўмовы. Вось асноўныя з іх:
- Харчаванне (сапраўднымі «ласункамі» для мозга з’яўляюцца дурніцы, авакада, цёмны шакалад, дзікі ласось, куркума, зялёная салата, яйкі). Таксама варта больш піць звычайнай вады — пры актыўнай працы мозг спажывае шмат вадкасці.
- Пазбаўленне ад САДаў — самастойных адмоўных думак. Прыслухайцеся да свайго ўнутранага дыялогу: ці з’яўляецца там штось накшталт «у мяне дрэнная памяць», «я ніколі гэтага не запомню», «я не ведаю» і т. п.? Проста так узяць і выкрасліць такія думкі не заўжды атрымліваецца. Таму, калі яны ўзнікаюць, дадаем слова «пакуль» — і карцінка намалюецца ўжо больш пазітыўная.
- Рух і глыбокае дыханне. Без дастатковай колькасці кіслароду чакаць эфектыўнай працы мозга не варта. Дыхальныя практыкі і фізічныя практыкаванні напоўняць ваш арганізм патрэбнай колькасцю кіслароду. А з дапамогай практыкаванняў можна яшчэ і патрэніраваць абодва паўшар’і мозга.
Фота: fizkes/Depositphotos.com
- Пазітыўнае атачэнне. Калі мозг не заняты плёткамі, жахамі, пошукамі доказаў, што ты лепшы і г. д., у вас ёсць больш рэсурсаў на іншую працу.
- Чысціня. Як ні дзіўна, але «творчы беспарадак» не спрыяе эфектыўнай працы мозга. Варта трымаць сваё працоўнае асяроддзе ў чысціні. Калі ўсё ляжыць па месцах, гэта і час эканоміць, і «падае прыклад» мозгу, каб інфармацыя ў ім таксама была раскладзена «па палічках».
- Абарона. Любыя фізічныя пашкоджанні і траўмы негатыўна адбіваюцца на эфектыўнасці працы мозга. Таму не забываемся пра шлем і беражэм сваю галаву.
- Навучанне. Пастаяннае вывучэнне новага не толькі трымае мозг у тонусе, але і жыццё падаўжае.
2. ВЖЭК
Выкарыстоўваючы гэты падыход, пры вывучэнні новай тэмы больш хутка і эфектыўна можна засвоіць разнастайную інфармацыю.
Фота: akloni-man.com
В — выкрэсліванне
1. Выкрэсліваем усё, што дзесьці чулі, ведалі па гэтай тэме. Падыходзьце да яе вывучэння з пазіцыі абсалютнага 0. Бо наш хітры мозг, маючы хаця б драбніцы нейкіх звестак, ужо лічыць сябе экспертам у тэме і запамінае нешта новае з вялікай неахвотай — «а навошта? я ж і так ужо ведаю».
2. Выкрэсліваем усе іншыя думкі. Часта, чытаючы ці праглядаючы нешта па тэме, думкамі мы блукаем у іншым месцы. Так хутка і трывала запомніць патрэбную інфармацыю наўрад ці атрымаецца.
3. Выкрэсліваем абмежаванні. Асабліва гэта датычыць «вялікіх» тэм: «я не здатны да вывучэння моў», «я ніколі не змагу запомніць усе гэтыя формулы» і т. п.
Ж — жывы розум. Атрымліваючы інфармацыю, не варта пасіўна яе «глытаць». Важна, каб мозг «працаваў» над ёй: вядзіце запісы ад рукі, задавайце пытанні, прымярайце на сябе, прадумвайце, як можна выкарыстаць атрыманыя веды у сваім жыцці.
Э — эмоцыі. Немалаважную ролю адыгрывае зыходны эмацыйны стан. Сядаючы за навучанне ў дрэнным настроі, наўрад ці можна дасягнуць выдатных вынікаў. Лепшы зыходнік для доўгай памяці — здзіўленне, зацікаўленасць і... смех!
К — коўчынг. Надзейна запомніць нешта новае вам дапаможа навучанне гэтаму іншага чалавека. Не проста пераказаць атрыманую інфармацыю, а дабіцца, каб ваш «кліент» зразумеў усё ад А да Я.
3. МІТ
Падыход, заснаваны на ўнутраных адчуваннях.
М — матывацыя. Перад вывучэннем задайце сабе пытанне «а навошта гэта менавіта мне?». Адказ мусіць быць прывабным для вас і не абавязкова занадта маштабным ці «высакародным». Напрыклад, трэба вывучыць табліцу множання. Навошта асабіста мне? Гэтыя веды дазволяць хутчэй пралічваць штосьці ў камп’ютарных гульнях, і я буду лепшым гульцом.
І — інфармацыя. Часта мы слухаем, але не чуем. Каб запомніць нешта, мы мусім гэта пачуць па-сапраўднаму. То-бок засяродзіцца менавіта на гэтым, быць у моманце тут і цяпер.
Т — тэхнікі і прыёмы. Сёння існуе шмат разнастайных мнемічных тэхнік і прыёмаў — вывучайце, падбірайце зручныя для сябе, і галоўнае — карыстайцеся імі!
4. «4 Т»
Гэты падыход дапаможа больш эфектыўна вывучаць замежныя мовы, напрыклад. Але падыдзе і для іншага.
Т — тэорыя. Своеасаблівы падмурак для трывалых ведаў. Збярыце фактычную інфармацыю, навуковыя даныя, статыстыку, даследаванні і г. д.
Т — тэхнікі. Вывучыце спецыяльныя тэхнікі і прыёмы (пра іх распавядзем у наступным артыкуле).
Т — трэніроўкі. Карыстайцеся гэтымі тэхнікамі! І штодня выкарыстоўвайце атрыманыя веды. Калі гэта новая мова — размаўляйце, чытайце на ёй.
Т — талака. Хутчэй і лягчэй вывучаць нешта маштабнае ў асяроддзі аднадумцаў. Збярыце своеасаблівую «тусоўку» (нават аднаго — двух сяброў будзе дастаткова), дзе вы зможаце дзяліцца новымі ведамі, сваімі дасягненнямі. Задаваць пытанні ці дапамагаць іншым.
Фота: delovoyjournal.com
5. «3 С»
Гэты падыход яшчэ называюць «формула поспеху С³»
С — свядомасць. Вывучаем, успрымаем не «на аўтамаце». Пагружаемся ў прадмет цалкам, не зліваючы сваю ўвагу на іншыя думкі, клопаты. Вывучаем новае ў такім сабе медытатыўным стане, калі ўся ўвага толькі на прадмеце вывучэння.
С — сэрца. Прапускаем кожную драбніцу інфармацыі праз сябе, свае адчуванні. Тое, што мы ўспрымаем эмацыйна, запамінаецца на больш доўгі тэрмін. А калі вельмі эмацыйна — то і на ўсё жыццё.
С — сіла. Сіла ў дзеянні. Практыкуем атрыманыя веды пры любой нагодзе. Калі такой нагоды няма — ствараем яе самі.
Абірайце падыход, які вам бліжэй — і наперад па новыя веды!
Па матэрыялах аўтарскай праграмы «Супермозг» Дж. Квіка для навучальнай платформы Mindvalley
АЯ, budzma.org
Чытайце па тэме:
Карысны перапынак: ідэі, як адпачываць сярод працоўнага дня
