У сённяшнім бясконцым інфармацыйным віры, каб быць паспяховым, важна навучыцца хутка і трывала запамінаць разнастайную інфармацыю. Са школьных гадоў мы звыклі проста завучваць неабходнае на памяць шляхам механічнага паўтарэння. Але ў тым інфармацыйным акіяне, што бушуе зараз навокал, механічнае завучванне — не вельмі эфектыўны ды надзейны метад.
Крыніца: holdyou.net
Мы прапануем 5 эфектыўных метадаў трывалага запамінання.
1. Метад 2-х слупкоў
Не сакрэт, што вядзенне канспекта моцна павышае эфектыўнасць запамінанння. Да таго ж, вы заўжды можаце звярнуцца да сваіх запісаў, калі нешта згубіцца ў вашай памяці.
А яшчэ больш эфектыўным ваш канспект будзе, калі яго весці «правільна». Лепш за ўсё пісаць ад рукі, але вядзенне электронных нататак таксама дапускаецца. Галоўнае — менавіта пісаць, а не выкарыстоўваць клавішы Ctrl+C i Ctrl+V.
Раздзяліце поле для запісаў на 2 слупкі. У першы занатоўвайце фактычныя звесткі — тое, што вы пачуеце/прачытаеце па тэме. У другім слупку насупраць кожнага факта пазначайце свае думкі на гэты конт: уражанні, пытанні, якім чынам гэты факт можна прымяніць у вашым уласным жыцці, і г. д.
Выглядае гэта прыкладна так:
|
Факты |
Уласныя думкі |
|
- Звесткі
- Падзеі
- Вынікі даследаванняў
- Характарыстыкі
- Даты
- … |
- Якія эмоцыі гэта выклікае
- Якія пытанні ўзнікаюць
- Як гэтаму можна навучыцца
- Як я гэта магу прымяніць на сваю карысць
- Каму я магу пра гэта расказаць… |
2. Метад прычэпкі, альбо «Сонечны спіс»
Крыніца: defectologiya.pro
Гэты метад цудоўна працуе, калі трэба запомніць дакладныя рэчы ў дакладным парадку (спісы).
Ствараем свой спіс «прычэпак» (кручкоў) — гэта мусяць быць добра знаёмыя вам прадметы ці аб’екты. Напрыклад: сонца, шкарпэткі, святлафор, машына, зорка, субота, вясёлка, васьміног, котка, далоні. Прачытайце яго 1 раз і назавіце па парадку словы, якія запомнілі.
А зараз да кожнага слова падбяром асацыяцыю, па якой яно і яго месца ў спісе запомняцца хутка і трывала.
1. Сонца. Яно адно. Гэта першае, што з’яўляецца зранку.
2. Шкарпэткі. Звычайна яны ідуць парай.
3. Святлафор. 3 колеры.
4. Машына. 4 колы, 4 дзверцы.
5. Зорка. 5 промняў.
6. Субота. 6-ты дзень тыдня.
7. Вясёлка. 7 колераў.
8. Васьміног. 8 «ног».
9. Котка. Мае 9 жыццяў.
10. Далоні. На 2-х далонях 10 пальцаў.
Колькі словаў у правільным парадку вы зможаце назваць зараз? Такі спіс можна зрабіць на 20, 50 аб’ектаў. Гэта першая частка метаду. Калі ў вас ёсць свой спіс кручкоў, на яго можна «вешаць» іншую інфармацыю.
Напрыклад, патрэбна запомніць элементы перыядычнай табліцы Мендзялеева. «Чапляем» кожны элемент да адпаведнага аб’екту з вашага базавага спісу. Заплюшчваем вочы і ва ўсіх дэталях уяўляем, як на Сонцы ўзнікае надпіс «Н — вадарод». А шкарпэткі ляцяць на геліевых балоніках. Святлафор «выліваецца» пасярод дарогі і г. д.
Спачатку метад падаецца складаным. Але як толькі вы створыце сабе базавы спіс, які будзе «адскакваць у вас ад зубоў», вы зможаце «чапляць» на яго патрэбную вам інфармацыю амаль аўтаматычна. Прычым гэты спіс універсальны — на адны і тыя ж «кручкі» вы можаце «вешаць» неабмежаваную колькасць аб’ектаў з розных сфер.
3. Метад МІР
М — месца, І — інфармацыя, Р — разам. Гэты метад заснаваны на прасторавых уяўленнях. З дапамогай яго можна запамінаць розныя рэчы: ад спісу прадуктаў, якія трэба набыць у краме, да тэзісаў свайго выступлення.
Абіраем месца. Для невялікіх спісаў можна выкарыстоўваць сваё цела. Для вялікіх — сваё жытло ці дарогу, якой вы крочыце на працу / вучобу.
Уяўляем сабе абранае месца і дзелім на лакацыі. Напрыклад, ваша цела: галава, плечы, грудзі, рукі, жывот, сцёгны і г. д. — у залежнасці ад колькасці прадметаў, якія трэба запомніць. А запамінаць будзем прадукты, карысныя для працы мозга: дурніцы, салата, куркума, шакалад, вада, ласось, грэцкі арэх.
Зараз «раскладаем» нашыя прадукты па выбраных лакацыях. Прычым яркай карцінкай. Чым яна будзе неверагодней і смяшней, тым лягчэй будзе запомніць. Напрыклад, уявіце, што на галаву вам сыплюцца дурніцы, на плячах як пагоны ляжыць зялёная салата, з грудзей сыплецца куркума, рукі брудныя ад шакаладу, у жываце, як у акварыуме, булькае вада... і г. д. Галоўнае — уяўляць ярка, у дэталях.
Пасля, калі вам спатрэбіцца гэта інфармацыя, вы проста ў думках «прабяжыцеся» па сваіх лакацыях, і карцінкі паўстануць самі сабой, паказваючы неабходныя аб’екты.
Тое самае і з вашай хатай альбо дарогай да працы — разбейце яе на лакацыі і «раскладайце» па іх неабходныя звесткі. Напрыклад, тэзісы свайго даклада: у вітальні размясціце вітальныя словы. На абутковую паліцу пакладзіце першы тэзіс і г. д.
4. «Тэхніка Рузвельта»
Крыніца: leonardohobby.by
Падыходзіць для хуткага запамінання імёнаў, замежных словаў. Пры знаёмстве, калі чалавек называе сваё імя, уявіце, што вы пішаце гэта імя яму на ілбе прыгожым маркерам. Колер абіраеце ў адпаведнасці з тым, якія эмоцыі і асацыяцыі выклікае ў вас гэты чалавек (альбо яго пасада, калі гэта, напрыклад, дзелавы кантакт).
Пры гэтым рабіце рукой мікрарухі, быццам вы і сапраўды пішаце імя (новае слова). Гэта дапаможа захаваць у памяці толькі што атрыманую інфармацыю.
У бліжэйшыя 5–10 хвілін пабудуйце размову (ці свае думкі) так, каб вымавіць імя новага знаёмага хаця б 2–3 разы. Звярніцеся да яго, прыгадайце іншых знаёмых з такім жа імем і д. п.
5. Фанетыка-лічбавы код
Метад запамінання лікаў. Лікі запамінаюцца значна горш, чым словы, для іх цяжка падабраць асацыяцыі і карцінкі. Звычайна мы «прывязваем» лікі да нейкіх вядомых нам дат: дні народзінаў, важныя даты з гісторыі і г.д.
З дапамогай фанетыка-лічбавага коду вы зможаце хутка і трывала запамінаць лікі любой даўжыні. Для гэтага метаду таксама трэба вывучыць «базу»: адпаведныя кожнай лічбе гукі (для лепшага запамінання выкарыстоўвайце асацыяцыі. Напрыклад: 0 — за/са — у англійскай мове «0» — zero. 1 — па напісанні нагадвае літару «т» і г. д.).
|
0 |
Са/за |
5 |
Ла |
|
1 |
Та/да/ца |
6 |
Жа/ча/ша |
|
2 |
На |
7 |
Ха/га/ка |
|
3 |
Ма |
8 |
Фа/ва |
|
4 |
Ра |
9 |
Па/ба |
Маючы такі код, вы можаце любыя лікі перавесці ў словы-карцінкі, дадаючы да зычных любыя галосныя (у фанетыка-лічбавым кодзе яны не ўлічваюцца).
Напрыклад, пін-код ад вашай карткі: 1547. Глядзім, якія гукі адпавядаюць гэтым лічбам (т, д, ц; л; р; х, г, к) і састаўляем з іх слова. Напрыклад, «талерка». Запомніць гэта слова вельмі проста — каб на талерцы не было пуста, трэба ведаць свой пін-код.
Любы лік можна разбіць на зручныя вам спалучэнні і на кожнае прыдумаць слова. Калі лік вялікі і слоў атрымаецца некалькі — звязаць іх у адзіную карцінку.
Зноў-такі, напачатку метад падаецца складаным. Насамрэч як толькі вы запомніце базавы код і «перакладзеце» некалькі важных для вас лікаў на карцінкі, далей усё пойдзе хутка і проста. Мозг прызвычаіцца да новага метаду і стане карыстацца ім амаль на аўтамаце.
Вывучайце, абірайце, адаптуйце пад сябе метады запамінання, і галоўнае — карыстайцеся імі! І няхай у вашай памяці заўжды будзе парадак.
Па матэрыялах аўтарскай праграмы «Супермозг» Дж. Квіка для навучальнай платформы Mindvalley
АЯ
