Алесь Тодараў разбіраецца на budzma.org з тым, чаму дэпрэсія — ці не самая папулярная хвароба XXI стагоддзя, адкуль яна бярэцца і чым насамрэч небяспечная.
Крыніца: psih-mariupol.com.ua
Згодна са статыстыкай, кожны пяты чалавек на планеце ў той або іншай форме пакутуе на дэпрэсію. Галоўныя прыкметы гэтай псіхалагічнай хваробы — працяглая апатыя, амаль поўная адсутнасць цікавасці да жыцця і пачуццё глабальнай адзіноты.
Міфы і легенды
Вакол дэпрэсіі ходзіць вялікая колькасць прыдумак, чутак і нават міфаў. Самыя распаўсюджаныя з іх гучаць прыкладна так:
— Дэпрэсіі не існуе, гэта ўсё лянота і слабы характар;
— Гэта толькі «ў галаве». Пры жаданні можна лёгка пазбавіцца негатыўных думак і эмоцый ды працягваць радавацца жыццю;
— Не хвароба, а глупства. Чалавек сам усё сабе напрыдумляў;
— Гэта проста дрэнны настрой, такое можа здарыцца з кожным;
— Ад дэпрэсіі ніхто яшчэ не памёр.
Такое памылковае неразуменне ўсёй сур’ёзнасці хваробы і яе абясцэньванне вядзе да таго, што многія людзі вельмі позна звяртаюцца па кваліфікаваную дапамогу. А дарма, бо навукоўцы лічаць, што дэпрэсія і пачуццё адзіноты могуць скараціць жыццё чалавеку хутчэй, чым курэнне або празмернае ўжыванне алкаголю. То-бок без нейкага фізічнага ўдзеяння на арганізм, выключна праз «галаву».
Чаму ўсё так?
Крыніца: kartinkin.net
Вядома, што акрамя храналагічнага ўзросту, які вымяраецца па даце нараджэння, можна разлічыць таксама і так званы біялагічны ўзрост. Яго высвятляюць на падставе фізіялагічных паказчыкаў арганізма, ладу жыцця і шэрагу іншых фактараў. Лічыцца, што чым большы біялагічны ўзрост, тым вышэй рызыка розных захворванняў і нават ранняй смерці.
Навукоўцы са Стэнфардскага ўніверсітэта і ўніверсітэта ў Ганконгу пабудавалі статыстычную мадэль «гадзін старэння» на аснове даных, якія былі атрыманыя ў 4846 дарослых у час даследавання. Гэтая мадэль улічвае 16 біямаркераў крыві, у тым ліку ўзроўні халестэрыну і глюкозы, полавую прыналежнасць удзельнікаў, а таксама паказчыкі ціску, індэкс масы цела і тое, як працуюць лёгкія.
У выніку ўдзельнікі, якія мелі ў анамнезе інсульт, хваробы пячонкі або лёгкіх, ацэньваліся мадэллю ў сярэднім больш старэйшымі, чым здаровыя людзі, якія маюць з тымі адзін і той жа храналагічны ўзрост. Гэтыя захворванні павялічвалі прадказаны мадэллю ўзрост на 18 месяцаў.
Таксама даследнікі выявілі і іншыя фактары, якія ўплываюць на тэмпы старэння, якія непасрэдна звязаны з псіхікай. Напрыклад, пачуццё няшчасця або адзіноты дадаюць да 1,65 года да біялагічнага ўзросту. Людзі, якія кураць, былі ацэненыя мадэллю на 15 месяцаў старэй, чым тыя, хто вядзе здаровы лад жыцця.
Такім чынам, атрымліваецца, што працяглая дэпрэсія можа старыць яшчэ хутчэй, чым шкодныя звычкі.
Чытайце яшчэ: Што такое негатыўныя ўстаноўкі?
Вінаваты рацыён?
Крыніца: kartinkin.net
Вядома, што харчаванне можа аказваць сур’ёзны ўплыў не толькі на фізічны стан, але і на псіхалагічны. Бо наш дзённы рацыён уздзейнічае на здароўе галоўнога мозгу па трох напрамках:
1. Для сінтэзу нейрамедыятараў і гармонаў у дастатковай колькасці неабходныя амінакіслоты, мікраэлементы і вітаміны.
2. Тое, што мы ямо, уплывае на мікрабіёту кішачніка, якая, у сваю чаргу, ужо непасрэдна ўплывае на стан мозгу.
3. Стан кішачніка ўплывае на ўсю імунную сістэму. А імунітэт мае цесную сувязь з галаўным мозгам.
Такім чынам, наша ежа можа аказваць даволі сур’ёзны ўплыў не толькі на цела, але і на мозг і нават псіхічнае здароўе.
Сярод прадуктаў, якія могуць выклікаць дэпрэсію, можна знайсці чырвонае мяса, бульбу, ачышчаныя злакі, ласункі, малочныя прадукты з высокім складнікам тлушчу. А вось не спрыяюць развіццю дэпрэсіі садавіна, гародніна, рыба, абястлушчаная малочка і прадукты, багатыя на антыаксіданты.
То-бок усё тое, што раяць, каб пазбавіцца лішняй вагі, прыдатна таксама і для таго, каб застрахавацца ад псіхалагічных хвароб. Яно і не дзіва, бо ментальнае здароўе і фізічнае насамрэч вельмі звязаныя між сабой.
Звычайна тыя, хто трымаюцца здаровага ладу жыцця, меней пакутуюць на дэпрэсію і іншыя ментальныя праблемы, бо як мінімум імкнуцца да гарманічнага развіцця асобы.
Чытайце яшчэ:
Алесь Тодараў, budzma.org
