Працягваючы рэй паэтычных падарожжаў у межах камапаніі “Будзьма”, вядомыя беларускія паэты Эдуард Акулін і Леанід Дранько-Майсюк завіталі ў Рэчыцу. Там 19 лістапада яны наладзілі адразу тры творчыя сустрэчы: у Рэчыцкай гімназіі №1, у Рэчыцкім педагагічным каледжы і сярэдняй школе №11.

У гімназіі №1 адбыўся своеасаблівы ўрок паэзіі для вучняў 11 класаў, дзе ў якасці настаўнікаў выступілі сталічныя госці. Яны гаварылі пра вялікі ўклад гомельскіх творцаў у скарбонку беларускай літаратуры, згадвалі імёны народных пісьменнікаў – выхадцаў з гомелькага Палесся: Івана Мележа, Івана Шамякіна, Андрэя Макаёнка і Івана Навуменку.

З незвычайным поспехам прайшла сустрэча ў Рэчыцкім педкаледжы, на якую сабралася каля двухсот навучэнцаў установы. На працягу ўсёй сустрэчы ў зале панаваў высокі дух беларускай паэзі і песні. “Дон Жуан” беларускай паэзіі Леанід Дранько-Майсюк зачараваў будучух настаўніц роднай мовы сваёй лірыкай кахання. Паэт і бард Эдуард Акулін прымусіў загучаць самыя патаемныя струны душы рэчыцкіх прыгажунь…

Не менш цікавай сталася і сустрэча ў 11 школе горада Рэчыцы, на якую сабраліся вучні 7 і 8 класаў. Па просьбе мінскіх гасцей яны чыталі на памяць вершы беларускіх паэтаў, разам з Эдуардам Акуліным спявалі песні на словы Леаніда Дранько-Майсюка.

На здымках:

1.Эдуард Акулін падчас выступу ў Гімназіі №1
2. Леанід Дранько-Майсюк у Рэчыцкім педкаледжы
3. З пераможцамі літаратурнага конкурсу ў СШ №11

Тэгі: Гомельшчына, Рэчыца