У Мінску абвясцілі пераможцаў конкурсу сацыяльных праектаў SAP UP 2018.

Конкурс сацыяльных праектаў SAP UP, партнёрам якога з’яўляецца кампанія “Будзьма беларусамі!”, праходзіць у Беларусі другі раз, мы сталі чацвёртай краінай, якая далучылася ад конкурсу, і сёлета фіналістамі сталі адразу дзесяць праектаў. Па словах арганізатараў, за год павысілася не толькі колькасць, але і якасць праектаў, якія трапілі на разгляд журы.

Што цікавіць людзей, якія падаюць свае праекты на конкурс? Насамрэч спіс атрымліваецца вялікім і разнастайным — ад захавання культурнай спадчыны Беларусі да працаўладкавання людзей з абмежаванымі магчымасцямі.

Стваральнікі праекта “Блізкія” маюць на мэце дапамагчы пенсіянерам атрымаць дадатковы заробак праз адмысловы сэрвіс, дзе будуць прадстаўленыя запатрабаваныя на рынку паслугі: ад рэпетытарства і выгулу сабак да працы ў юрыдычных і бухгалтарскіх кірунках.

Праект “Прыродныя вітаміны — здаровая нацыя” прапануе стварыць бізнес па вырошчванні малінаў (а ў перспектыве і іншых ягадаў) без выкарыстання хімікатаў. Да таго ж “Прыродныя вітаміны” дапамогуць людзям з ментальнымі асаблівасцямі працаўладкавацца і атрымліваць за збор малінаў вартыя грошы.

Новы падыход да міждысцыплінарнай адукацыі прапануюць аўтары праекта STEM-3500 (абрэвіятура паходзіць ад англійскага “навука, тэхналогіі, інжынерыя, матэматыка”, а лічба 3500 — колькасць школ у Беларусі). Мэта праекта – арганізацыя СТЭМ-цэнтраў у межах дадатковай школьнай адукацыі. Цяпер над праектам працуе 11 педагогаў, а СТЭМ-цэнтры функцыянуюць у пяці беларускіх школах, дзе дзеці вывучаюць робататэхніку і прапануюць свае ўласныя навуковыя стартапы.

Адзначаны другім месцам праект ETHNO.by мае амбітную задачу сабраць “усю беларускую этнаграфію” на адным сайце: па словах аўтараў, яны змогуць сістэматызаваць усю наяўную інфармацыю, якая будзе карыснай як прафесіяналам ад этнаграфіі, так і аматарам. Сайт уключае друкаваныя, аўдыё- і відэаматэрыялы і зможа стаць добрым дапаможнікам для адмыслоўцаў, а таксама для людзей, якія займаюцца культурніцкім турызмам.

У кожнага трэцяга беларуса ёсць “асаблівы” знаёмы — чалавек з ментальнымі праблемамі. Дапамагчы атрымаць працу і вартыя грошы такім людзям хочуць аўтары праекта “Добрае печыва”: людзі з асаблівасцямі пад наглядам і з дапамогай прафесіяналаў будуць ствараць hand-made печыва, якое будзе распаўсюджвацца па офісах, кавярнях і каворкінгах. У самым пачатку на працу трапяць пяць чалавек, а пры паспяховым развіцці праект плануе пашырыцца.

Яшчэ адно прызавое месца атрымаў стартап Whisper — відэа-мэсэнджар для людзей з паніжаным слыхам ці адсутнасцю слыху. Заснаваны на нейронных сетках мэсэнджар будзе распазнаваць тэкст па руху вуснаў суразмоўцы. Патэнцыйных карыстальнікаў мэсэнджара толькі на рускамоўнай прасторы 450 000 чалавек.

Прадстаўнікі гомельскага машынабудаўнічага каледжа падалі на конкурс праект інклюзіўнага тэатра “Тэатр цішыні” для людзей з парушэннем слыху. Цяпер у каледжы навучаецца 35 чалавек з праблемамі слыху, і стварэнне тэатра зможа зламаць бар’ер паміж асаблівымі і звычайнымі навучэнцамі праз творчы працэс. Цяпер тэатр плануе стварыць пастаноўку паводле “Маленькага Прынца” Сэнт-Экзюперы і правезці яе па краіне.

Пра праект “Новае жыццё ў абмен на накрыўкі”, накіраваны на збор накрывак ад пластыкавых бутэлек, далейшую іх пераапрацоўку і дабрачынныя акцыі на атрыманыя грошы, беларускія СМІ пісалі неаднаразова. Пры гэтым цяпер праект імкліва пашыраецца: ужо ахапіўшы 50 населеных пунктаў па краіне. Арганізатары хочуць падключыць яшчэ 30. Кіраўніцтва гандлёвых цэнтраў і ўстановаў адукацыі, дзе акцыя ўжо дзейнічае, падтрымліваюць праект. Паводле аўтараў праекта, пры пашырэнні дапамогу зможа атрымаць 140 дзяцей у год.

Праект “Кавярня NORM” прапануе стварыць культурніцкую інклюзіўную прастору для людзей з абмежаванымі магчымасцямі і для жанчын, якія пакутуюць ад хатняга гвалту. Кавярня будзе мець некалькі функцый: гэта і праца для жанчын – ахвяраў гвалту, і арганізацыя цалкам даступнай для кожнага культурніцкай і камунікатыўнай прасторы.

Бясспрэчным жа лідарам сярод праектаў, а таксама лаўрэатам Гран-пры сёлетняга SAP UP стала ініцыятыва On Wheels. Аўтары праекта прапануюць стварэнне сацыяльнага прадпрыемства па вытворчасці сродкаў рэабілітацыі — накладак на колы інвалідных вазкоў, дошак для перасоўвання ляжачых хворых і іншых прыладаў, якія спросцяць жыццё людзям з абмежаванымі магчымасцямі. Да таго ж праект прадугледжвае працаўладкаванне такіх людзей і стварэнне камфортнай прасторы для іх працы.

Мікалай Левертаў