Гэта ўжо другі фестываль традыцыйнай беларускай культуры Soncahraj, сёлета ён адбываўся 9, 10, 18 чэрвеня ў Дубічах-Царкоўных, Саколе, Цясна адпаведна. Заключная імпрэза фестывалю мае адбыцца 24 чэрвеня на пляжы ў Бандарах.
«Праз Soncahraj ужо другі год хочам прэзентаваць традыцыйную беларускую культуру як з Беларусі, так і з Падляшша. Вельмі важным нам падаецца, каб пры нагодзе гэтага фестывалю адбывалася ўзаемнае пазнанне, вяртанне ў агульную культурніцкую прастору традыцыйнага фальклору, традыцыйнай культуры беларусаў Падляшша, якія ўжо 80 гадоў адрэзаныя мяжой ад Беларусі, і пра гэтую спеўную спадчыну шырокаму колу беларусаў мала што вядома», — так распавядае пра фестываль адзін з арганізатараў журналіст Зміцер Косцін.
Канцэрты сёлетняга Soncahraj атрымаліся падобныя на пэўную гасціну, бяседу без традыцыйных сцэнаў, без дыстанцыі між удзельнікамі і наведвальнікамі. Арганізатары імкнуліся стварыць пляцоўку, дзе можна танчыць, вакол якой можна паставіць сталы, прыйсці туды з кошыкам ежы, паслухаць, паназіраць і скарыстацца з майстар-класаў. Усё агучанае прымеркавана і да фінальнай сустрэчы, якая адбудзецца 24 чэрвеня. Заключная фестывальная імпрэза пройдзе на пляжы ў Бандарах 24 чэрвеня, дзе наведнікам прапануюць супольна адсвяткаваць Купалле.
Soncahraj-22
У праграме:
З 16:00 майстар-класы:
— традыцыйныя крайкі з Ірынай Мазюк;
— падляскі абрадны ручнік з Алінай Дэмбоўскай;
— пляценне вянкоў і развучванне купальскіх песняў.
З 17:00:
— купальскія зёлкі з Агнешкай Прымакай;
— выцінанка з Натальляй Сухой;
— традыцыйныя інструменты (дуда, ліра ды іншыя);
— майстар-клясы беларускіх традыцыйных танцаў;
З 18:00:
— сўсустрэча з аўтарам кнігі «Шэпт» Сяргеем Лескецем.
На Кірмашы Творцаў можна будзе прыдбаць традыцыйныя рамесніцкія вырабы ды паласавацца прысмакамі ад мясцовых гаспадынь да традыцыйнага купальскага «крупніка» — пітнога мёду з дадаткамі спецыяў, прыгатаванне якога плануецца каля 18:30.
«Hajda Banda» на фестывалі Soncahraj-22
Далей па праграме арганізатары абяцаюць супольныя танцы і спевы. У завяршальнай імпрэзе прымуць удзел:
— Спеўны гурт з Дубіч Царкоўных
— «Чырвоныя Шпількі»
— Амэлія Пятрочук
— ZHRAJA
— Капэля Алены Мялешкі (Беларусь)
— Сьпеўны гурт з Дабрывады
— «Беларускі цуд» (Літва)
— Капэля «Колісьнія» (Беларусь)
— Miareža (Беларусь)
— Hajda Banda / Гайда банда
Апроч танцаў і спеваў наведвальнікаў фестывалю чакаюць традыцыйны купальскі карагод і спевы ля вогнішча. Арганізатары таксама прапануюць ўзяць з сабою намёты і заначаваць на мясцовым кэмпінгу.
