28 лістапада 2018 г. Будслаўскі фэст уключаны ў Рэпрэзентатыўны спіс нематэрыяльнай культурнай спадчыны чалавецтва ЮНЕСКА.
Будслаўскі фэст, 2019 г. Фота: catolic.by
Будслаўскі фэст — штогадовая ўрачыстасць у гонар ушанавання абраза Маці Божай Будслаўскай, які захоўваецца ў касцёле Унебаўзяцця Найсвяцейшай Дзевы Марыі ў в. Будслаў на Мядзельшчыне. Гэты абраз вядомы шматлікімі цудамі, а само мястэчка — як месца з’яўлення вернікам Найсвяцейшай Дзевы Марыі. Мясцовая легенда цвердзіць, што яно адбылося 2 ліпеня 1588 года.
Мястэчка Будслаў з’яўляецца галоўным месцам паломніцтва беларускіх католікаў. На фэст з’язджаюцца паломнікі і з іншых краін: Польшча, Літва, Латвія, Украіна, нават Расія і Італія. Найвялікшай павагай карыстаюцца паломнікі, якія дабраліся ў Будслаў не транспартам, а пераадолелі шлях пешшу.
Будслаўскі фэст адбываецца штогод у першую пятніцу і суботу ліпеня. На ўрачыстасць з’язджаюцца, як правіла, усе біскупы Каталіцкай Царквы Беларусі, вялікая колькасць святароў і прадстаўнікі самых розных манаскіх ордэнаў. Абавязкова ўдзельнічае ва ўрачыстасцях Апостальскі нунцый у Беларусі. Прыязджаюць у Будслаў прадстаўнікі Грэка-Каталіцкага духавенства і Праваслаўнай Царквы, а таксама іерархі іншых краін, прадстаўнікі ўрада і мясцовага кіраўніцтва. Людзі дабіраюцца нават сем’ямі да Будслава, каб прыняць удзел ва ўрачыстасці.
На месцы паломнікаў сустракаюць вітальнымі словамі святары і біскупы, адбываюцца Святыя імшы адна за адной, малітоўнае чытанне для моладзі, начная ўрачыстая працэсія са свечкамі, гадзіны малітваў да Маці Божай.
У незалежнай Беларусі першы раз Будслаўскі фэст адбыўся ў 1992 годзе, тады ўдзел прынялі 45 груп пілігрымаў. 2 ліпеня 1996 года архібіскуп Дамінік Грушаўскі перадаў папскую булу, у якой Маці Божая Будслаўская абвяшчалася апякункай Мінска-Магілёўскай архідыяцэзіі. Роўна праз два гады цудадзейны абраз Маці Божай Будслаўскай быў каранаваны папскімі каронамі. Абрад здзейсніў першы беларускі каталіцкі кардынал, арцыбіскуп Мітрапаліт Мінска-Магілёўскі Казімір Свёнтак. Арцыбіскуп абвесціў Маці Божую Будслаўскую заступніцай Беларусі, а мясцовы касцёл — нацыянальным санктуарыем.
Пастановай Савета Міністраў Рэспублікі Беларусь ад 2 жніўня 2016 года Будслаўскі фэст унеслі ў Дзяржаўны спіс гісторыка-культурных каштоўнасцей Рэспублікі Беларусь.
28 лістапада 2018 года фэст заняў радок у яшчэ больш ганаровым спісе — нематэрыяльнай культурнай спадчыны чалавецтва.
АМ, budzma.org
