У Вільні адкрылася новая кавярня «Карчма 1863», дзе повар і заснавальнікі — беларусы. Пакуль установа працуе ў тэставым рэжыме, але з 23 студзеня ўладальнікі абяцаюць працаваць «на поўную моц», піша citydog.io.
«Мы хочам прынесці часцінку дома, часцінку Беларусі ў Вільню. З 23 студзеня будзем працаваць на поўную моц, а пакуль будзем тэсціраваць паволі. Зазірайце да нас абавязкова. Вельмі чакаем сустрэчы з вамі», — напісана ў сацсетках установы.
Як расказваюць уладальнікі, ідэя адкрыць кавярню прыйшла ім нечакана: «Тры беларусы шукалі месца для зусім іншага праекту, але аднойчы, аглядаючы адно з памяшканняў, пачулі, што ў ім некалі збіраліся паўстанцы і «гэты ваш Каліноўскі». І не змаглі прайсці міма. Нашы сэрцы апынуліся ў палоне ідэі карчмы «1863». Усё было вырашана імгненна».
«Так, гэта авантура, — прызнаюцца заснавальнікі, — мы ніколі не працавалі ў гэтай сферы, але мы ведаем, што ўсяму можна навучыцца, калі ёсць агонь і жаданне. І, канешне, падтрымка ад вас, людзей, якім не ўсё роўна».
Затэсціць кавярню можна ў Вільні па адрасе Bokšto, 2.
