Неўзабаве на будынку будзе красавацца купал, тынкоўка элементаў якога пачнецца на днях, паведаміў настаяцель храма іерэй Аляксандр Маркевіч.

Храм Нараджэння Прасвятой Багародзіцы, пабудаваны ў 1895 годзе, у Свячы пачалі адраджаць мінулай вясной. Спраўляюцца сваімі сіламі святар, стараста храма і некалькі вернікаў. Летась яны самастойна нарыхтавалі піламатэрыялы, а летам практычна штодня працуюць над аднаўленнем каменнай царквы. Працы вядуць за свой кошт, некаторыя этапы бяруць на сябе віцебскія прадпрымальнікі, а будаўнічую тэхніку пры неабходнасці вылучаюць мясцовыя ўлады.

Залацісты купал пакуль знаходзіцца на зямлі, дзе яго падрыхтоўваюць для ўстаноўкі. Каб скараціць колькасць работ на вышыні, яго вырашылі сабраць унізе, дарабіць карнізы, ўставіць вокны, а ўжо пасля мантажу тынкаваць. Цяпер і аздобныя працы будуць весці на месцы — так зручней і хутчэй.

Побач з каменным праваслаўным храмам у Свячы стаіць драўляная царква, куды жыхары размешчаных побач населеных пунктаў прыходзяць на малітву. Нярэдка сюды зазіраюць і турысты, праязджаючы аграгарадок у Бешанковіцкім раёне Віцебскай вобласці. Прыход зусім нешматлікі — у нядзельны дзень колькасць людзей на службе можна пералічыць па пальцах адной рукі. Аднаўленне храма Нараджэння Прасвятой Багародзіцы, як лічыць настаяцель, можа стаць для гэтага месца адраджэннем ва ўсіх сэнсах. Зіхатлівы купал, прыкметны з абодвух бакоў дарогі, будзе прыцягваць увагу як мясцовых жыхароў, так і падарожнікаў, што дазволіць ажывіць прыход.