Увосень беларусы традыцыйна стагоддзямі гатавалі кіслую капусту, якую елі як самастойную страву, а таксама дадавалі ў іншыя стравы такія, як бігас ці супы. Зараз кіслую капусту можна не гатаваць, а набыць на рынку ці ў краме. Але ці будзе яна падобная па смаку на тую самую, з вёскі? Распавядаем, як хутка, танна і смачна заквасіць капусту.
Страва, што стала традыцыйнай на сталах беларусаў
Квасіць капусту першымі ў свеце пачалі кітайцы яшчэ да нашай эры. Гэтай стравай кармілі працоўных, што ўзводзілі Кітайскую сцяну. Невядома, калі дакладна на нашых землях пачалі квасіць капусту, але, безумоўна, гэтая страва старадаўняя, і ўжо шмат стагоддзяў таму стала традыцыйнай на сталах беларусаў.
Сярод даследчыкаў гісторыі ёсць меркаванні, што гэтую гародніну з вандроўкі ў Канстанцінопаль прывёз кіеўскі князь Алег напачатку Х стагоддзя. Князь прывёз шмат відаў гародніны, але з-за марозаўстойлівасці капуста, у адрозненне ад іншых культур, прыжылася вельмі добра.
Папулярнасць капусты хутка ўзрастала як сярод знаці, так і простага люду, і за пару стагоддзяў стравы з гэтай гародніны сталі звыклымі для нашых продкаў. Згодна даследчыку гісторыі беларускай кухні Алесю Беламу, шырокую папулярнасць капуста займела ў часы Вялікай княгіні Боны. Кіслую капусту дадавалі ў бігас, капуснік, ці падавалі як гарнір або закуску.
Звычайна капусту нашыя продкі квасілі ўвосень. Каб яна добра заквасілася, не трэба мудрагелістых і дарагіх інгрыдыентаў. Капусту рэжам адвольна, выдаляем качарыгу, шынкуем тонка, можна потым яшчэ дадаткова пасячы ўздоўж і ўпоперак, калі маеце жаданне. Не абавязкова карыстацца нажом, хутчэй будзе на шынкавальні.
Моркву таркуем на грубую тарку. Нарыхтаваную гародніну перакласці лепей у эмаляваны ці драўляны посуд, дадаць соль, крыху цукру, пры жаданні для пікантнасці зусім трошкі парашку чорнага і духмянага перцу. Можна дадаць кмен, тады страва насычаецца цікавым водарам і смакам. Добра вымешайце капусту, моцна цісніце яе, пакуль не пойдзе сок. Тады накрыйце посуд ручніком і пакіньце пры пакаёвай тэмпературы на суткі, прыціснуўшы капусту нейкім грузам. Можна выкарыстаць талерку і міску з вадой.
Праз дзень зрабіце дзюркі, каб з капусты выходзіла паветра ад браджэння. Праз дзень усыпце журавіны, калі яны смакуюць вам. Перамяшайце і пакіньце яшчэ на суткі. Лепш за ўсё гэтыя тры дні капусту прыціскаць і накрываць посуд ручніком ці тканінай. Праз 72 гадзіны капуста будзе гатовая. Выкладвайце яе ў слоік і стаўце ў халоднае месца, каб спыніць працэс браджэння. Такім чынам можна захоўваць капусту ажно да 6 месяцаў.
Падаваць кіслую капусту можна як заўгодна. Адзін з лепшых тражыцыйных варыянтаў — заправіць тонка парэзанай цыбуляй і нерафінаваным алеем. Хлеб з салам і часнаком дадасць такому перакусу смаку і сытнасці.
Смачна есці!
Нам спатрэбіцца:
Капуста белакачанная — 1, 5 кілаграма
Морква — 150 грамаў
Соль — 45 грамаў
Цукар — 15 г
Перац чорны і духмяны, кмен і журавіны — па жаданню і смаку.
Калі вам падабаюцца нашыя відэапраекты і аўтарскія артыкулы, вы можаце падтрымаць рэдакцыю «Будзьмы», набыўшы нам кубачак кавы. Гэта дапаможа нам стварыць больш цікавых відэаролікаў і арыгінальных артыкулаў.
