Дзелімся рэцэптам лёгкай летняй стравы, якая можа ўжывацца і як гарнір, і самастойна. Свежыя парасткі фасолі выдатна спалучаюцца з лісічкамі і зелянінай, а смятана дадае далікатны вяршковы смак. Гатуецца квасоліха хутка і проста.
Квасоліха зімовая і летняя, якая смачней?
Традыцыйна лічыцца, што квасоліху гатавалі ўзімку, пасля святаў, калі самыя смачныя прадукты ўжо з’елі за святочным сталом. На дапамогу прыходзілі бабовыя культуры, якія здаўна ўжывалі нашыя продкі. У XVI стагоддзі да гароху і бобу далучаецца новая культура — фасоля. Страва, прагатаваная з фасолі з гароднінай і салам, займела назву «квасоліха». Падобную да квасоліхі страву вельмі любіў магнацкі род Радзівілаў. Узяўшы за аснову сялянскую страву і аздобіўшы яе пэўнымі інгрэдыентамі, радзівілаўскі кухар на стагоддзі пакінуў у гісторыі беларускай кулінарнай справы след — рэцэпт фасолі па-радзівілаўску. Пра страву і яе гісторыю можна пачытаць тут.
Глядзіце яшчэ: Фасоля з меню Радзівілаў. Гатуем разам з «Будзьма»
Як прыгатаваць летнюю квасоліху?
1. У прамытых парасткаў фасолі выдаліць пладаножкі і кончыкі, разрэзаць на дзве-тры часткі. Прыварыць у кіпені да 3 хвілін. Пасля абваркі фасолю дастаць з рондаля, крыху астудзіць і прасушыць, каб на патэльні гарачае масла не пачало моцна пырскаць.
2. Цыбулю парэзаць паўкольцамі, прысмажыць на масле да змены колеру.
3. Дадаць да цыбулі адвараныя лісічкі і фасолю, соль і перац на смак. Перамяшаць інгрэдыенты і смажыць на маленькім агні каля 2 хвілін.
4. Дадаць здраблёны часнок. Яшчэ раз перамяшаць, каб яго водар раскрыўся.
5. Усыпаць насечаную зялёную цыбулю і дадаць пару лыжак смятаны, добра вымешаць, дачакацца бурбалак і таміць страву каля 5 хвілін.
6. Пасыпаць перад падачай насечанай пятрушкай.
Смачна есці!
На 4 порцыі нам спатрэбяцца:
Вада — 2 літры
Фасоля — 800 грамаў
Цыбуля — 200 грамаў
Лісічкі — 120 грамаў
Масла — 30 грамаў
Часнок — 2 зубчыкі
Пук зялёнай цыбулі і пятрушкі
Соль і перац — па смаку
Больш рэцэптаў серыі «Гатуем з «Будзьма!»
