Колькасць песень расійскіх музыкаў, якія ўваходзяць у топ-10 самых папулярных у Apple Music, за год скарацілася амаль ва ўсіх постсавецкіх краінах, акрамя Арменіі. У Беларусі сталі слухаць менш расійскіх музыкаў, чым у мінулым годзе, а Казахстан і Украіна амаль цалкам пераключыліся на мясцовых выканаўцаў, паведамляе РБК.
У снежні мінулага года РБК на аснове статыстыкі Apple Music аналізаваў хіт-парады найбольш папулярных кампазіцый у рамках спецпраекта «30 гадоў без СССР». Тады былі вывучаны рэйтынгі дзесяці найбольш папулярных кампазіцый для кожнай постсавецкай краіны (акрамя Грузіі) па дадзеных на 2 снежня 2021 года.
Акцэнт быў зроблены на песнях замежных музыкаў, якія з’яўляюцца найбольш папулярнымі на тэрыторыях краін СНД. На аснове дадзеных Apple Music аналізаваліся перавагі аўдыторыі Латвіі, Літвы, Эстоніі, Беларусі, Малдовы, Украіны, Азербайджана, Арменіі, Казахстана, Кіргізіі, Таджыкістана, Туркменіі і Узбекістана. 1 снежня 2022 года РБК правёў аналагічныя падлікі і супаставіў звесткі са статыстыкай гадавой даўнасці.
Атрыманая статыстыка паказала, што ў Беларусі сталі менш слухаць расійскіх выканаўцаў, чым у 2021 годзе. Калі летась у «топе» па Беларусі 7 з 10 пазіцый былі занятыя прасійскімі выканаўцамі, то цяпер толькі 3 з 10.
Найбольш істотныя змены за год адбыліся ў перавагах ўкраінскіх карыстальнікаў. Калі год таму практычна ўвесь топ-10 для гэтай краіны быў прадстаўлены расійскімі музыкамі і толькі дзевятае месца займаў украінец Іван Дорн, то цяпер адзінай расійскай спявачкай, якая патрапіла ў рэйтынг, стала Instasamka. Шэсць радкоў з дзесяці займаюць ўкраінскія выканаўцы, яшчэ два — амерыканцы Lady Gaga і Eminem.
Паўплываць на гэтак моцныя змены ў хіт-парадзе мог закон «аб забароне на публічнае выкананне расійскай музыкі ва Ўкраіне», які з 7 кастрычніка ўступіў у сілу. Прайграванне песен і гастролі грамадзян Расіі дазваляюцца толькі ў тым выпадку, калі музыка публічна выказаўся супраць ваеннай агрэсіі ва Украіне.
