«Мова. Цудоўная» — першая настольная гульня OZ на беларускай мове, створаная ў калабарацыі брэнда і творчай групы «А-Чатыры» з Гродна. Гульня знаёміць з беларускім алфавітам і дапамагае папоўніць слоўнікавы запас цікавымі словамі роднай мовы. А яшчэ гэта выдатная нагода весела і карысна бавіць час з сям’ёй і сябрамi.
«Мова. Цудоўная» — гэта сто слоў, сярод якіх простыя і зразумелыя «вусны», «падабайка», «заплечнік» і больш складаныя, напрыклад, «арэлі», "рондаль","фiранкi", «швэдар». У наборы — слоўнік беларускiх, рускiх і англійскiх адпаведнікаў, якія для адных стануць падказкай, а для кагосьцi — спосабам хутчэй засвоіць новае.
У «Мовы» тры варыянты сцэнарыя. Рэкамендаваны ўзрост удзельнікаў — ад 14 гадоў, але строгіх абмежаванняў няма. Гуляць адначасова могуць ад 2 да 6 чалавек. Працягласць — 20-30 хвілін — залежыць ад падрыхтаванасці ўдзельнікаў. Кошт — 21 BYN.
Настольную гульню на беларускай мове ўжо сёння можна набыць у фірмовых крамах сеткі, праз дадатак OZ альбо на сайце OZ.by.
