Унікальны арт-праект “Восеньскі салон”, які не мае аналагаў у культурным жыцці рэспублікі, прысвечаны 25-годдзю Белгазпрамбанка і з’яўляецца часткай маштабнай банкаўскай ініцыятывы “Арт-Беларусь” па рэканструкцыі цэласнага і бесперапыннага працэсу развіцця беларускай культуры. Калі папярэднія мастацкія праекты Белгазпрамбанка дэманстравалі багатае мінулае мастацтва Беларусі, то “Восеньскі салон” мае на мэце раскрыць яго будучыя перспектывы і сучасны патэнцыял.

З гэтай мэтай была сфармавана экспазіція, што складаецца з твораў 90 лепшых маладых беларускіх мастакоў, якія прайшлі адборачны тур і з’яўляюцца прэтэндэнтамі заснаванай Белгазпрамбанкам прэміі “Арт-Беларусь”. Працы, прадстаўленыя на выставе ў Палацы мастацтва, выкананы аўтарамі за апошнія тры гады ў самых розных мастацкіх тэхніках (жывапіс, графіка, скульптура, пластыка са шкла, фатаграфія, інсталяцыя) і прадстаўляюць лепшае са створанага ў беларускім мастацтве ў пачатку ХХІ стагоддзя.

Арганізатары кіраваліся намерам стварыць атмасферу рэальных парыжскіх Восеньскіх салонаў пачатку мінулага стагоддзя, вядомых сваёй наватарскай арыентацыяй і дэмакратычнымі традыцыямі. Так, сярод удзельнікаў “Восеньскага салона” ў Мінску апынуліся як дастаткова вопытныя майстры, сапраўдныя члены Беларускага саюза мастакоў, так і цяперашнія студэнты Акадэміі мастацтваў, а таксама таленавітыя самародкі, што не маюць спецыяльная мастацкай адукацыі. У выставе прымаюць удзел як прадаўжальнікі традыцый класічнага мастацтва, так і прыхільнікі сучасных нетрадыцыйных мастацкіх стратэгій. Многія аўтары маюць у сваім багажы замежныя стажыроўкі, з’яўляюцца лаўрэатамі спецыяльнага фонду Прэзідэнта Рэспублікі Беларусь па падтрымцы таленавітай моладзі. Ёсць сярод канкурсантаў і прадстаўнікі вядомых у нашай краіне мастацкіх дынастый.

Выстава сучасных беларускіх аўтараў будзе дапоўнена шэдэўрамі сусветнага жывапісу і скульптуры з карпаратыўнай калекцыі Белгазпрамбанка – створанымі нашымі знакамітымі суайчыннікамі, прадстаўнікамі легендарнай Парыжскай школы, рэальнымі ўдзельнікамі французскіх Восеньскіх салонаў першай паловы ХХ стагоддзя. Разам з упадабанымі творамі Хаіма Суціна і Міхаіла Кікоіна мінскай публіцы ўпершыню будуць прадстаўлены апошнія з банкаўскіх набыткаў, такія як гуаш “Самнамбул” Марка Шагала, палатно “Ноч святога Івана” Дзмітрыя Стэлецкага, літаграфія “Гарадскі пейзаж” Восіпа Любіча, скульптуры Паліны Хентавай і Леона Індэнбаўма, малюнкі Яўгена Зака.

Дзякуючы ўпершыню заснаванай у нашай краіне прэміі маладым мастакам “Арт-Беларусь”, найбольш перспектыўныя аўтары атрымаюць рэальны шанец рассунуць далягляды сваёй кар’еры. Прызавы фонд у суме, эквівалентнай 25.000 еўра (у беларускіх рублях па курсе НБРБ на дзень выплаты), разлічаны на фінансаванне будучых праектаў і творчых стажыровак пераможцаў праекта.

Ацэньваць удзельнікаў будзе аўтарытэтнае журы, у складзе якога – прызнаныя эксперты ў галіне сучаснага мастацтва міжнароднага ўзроўню: Аэса Сігуронсдоццір (незалежны куратар, Рэйк’явік – Парыж), Гаспарэ Манас (мастак, куратар, заснавальнік фонду сучаснага мастацтва Gaspare foundation (Венецыя), Дытар Роелстратэ (член куратарскай каманды выставы documenta 14 (Касэль, 2017 (Германія), Тэрэза Іяроччы Мавіка (дырэктар фонду Леаніда Міхельсона “Вікторыя – Мастацтва быць Сучасным” (V-A-C), Масква).

Уладальніка прыза глядацкіх сімпатый вызначаць наведвальнікі выставы, а таксама ўдзельнікі анлайн-галасавання на сайце artbelarus.by.

Мэта праекта “Восеньскі салон з Белгазпрамбанкам” – прадставіць Беларусь часткай сучаснай сусветнай арт-індустрыі. Для гэтага арганізатарамі прадпрымаюцца крокі па фармаванні айчыннага рынку твораў мастацтва. Так, усе працы, што ўдзельнічаюць у праекце, ацэнены самімі аўтарамі і прапануюцца наведвальнікам выставы для пакупкі. Па словах старшыні Белгазпрамбанка Віктара Бабарыкі: “Калі з’явяцца галерэі і аўкцыённыя дамы, будзе працаваць сістэма бізнес-адносінаў, тады можна будзе казаць пра паўнавартасны арт-рынак з продажамі і прасоўваннем. У гэтым сэнсе “Восеньскі салон” вырашае задачы па пошуку патрэбных механізмаў для працы”.

“Восеньскі салон з Белгазпрамбанкам” задуманы як актыўная пляцоўка прэзентацыі сусаснага беларускага мастацтва, і насычаная адукацыйная праграма (лекцыі, круглыя сталы, заняткі з дзецьмі) паклікана ажывіць дыялог публікі з арт-прасторай.

Плануецца, што арганізацыя “Восеньскага салона” і заснаванай ўпершыню Белгазпрамбанкам прэміі дзеячам мастацтва “Арт-Беларусь” стане штогадовай традыцыяй, што ўпрыгожвае культурнае жыццё беларускай сталіцы.

Арганізатары арт-праекта: ААТ “Белгазпрамбанк”, ГА “Саюз беларускіх мастакоў”, Рэспубліканская мастацкая галерэя (Палац мастацтва), Цэнтр візуальных і выканальніцкіх мастацтваў “АРТ карпарэйшн” – пры падтрымцы Міністэрства культуры Рэспублікі Беларусь і Пасольства Французскай Рэспублікі ў Рэспубліцы Беларусь.

Выстава-продаж “Восеньскі салон з Белгазпрамбанкам” будзе ладзіцца з 8 кастрычніка да 8 лістапада (уключна) 2015 года ў Палацы мастацтва (Мінск, вул. Казлова, 3).

Час працы выставы:

11.00 – 20.00 штодзённа, акрамя панядзелка.

Усе падрабязнасці пра мерапрыемства – на сайце artbelarus.by.

«Восеньскі салон з Белгазпрамбанкам» у FB: https://www.facebook.com/events/1630155450533597/

«Восеньскі салон з Белгазпрамбанкам» у Instagram: https://instagram.com/osenniisalon/

Тэлефоны для даведак:

(017) 229 77 17, (017) 229 16 54 (Белгазпрамбанк), (017) 288 15 49 (Палац мастацтва)