У бліжэйшыя святочныя выходныя беларусы па ўсім свеце ладзяць імпрэзы, прымеркаваныя да Калядаў. Майстар-клас па роспісе шопераў «Цмокі-цмокі» ў Мінску, калядкі ў Азярцы, калядныя кірмашы, калядная ялінка для дзетак, батлейка, калядныя этнавечарыны, канцэрты, выставы — выбірайце падзеі ў сваім горадзе і на свой густ. Святкуйце па-беларуску ў любой кропцы свету.
Беларусь
Мінск і Мінская вобласць
У суботу, 23 снежня, у музеі гісторыі беларускай літаратуры — майстар-клас па роспісе шопераў «Цмокі-цмокі» з Ірынай князевай у межах праекта «Пісаная торба».
З нагоды надыходзячага года агнядышнага Дракона мусім узгадаць, што ў нас ёсць свой, беларускі дракон, які завецца Цмокам, — зычлівая і прыязная да чалавека істота.
Цмок шкадуе і ратуе людзей, а яшчэ дапамагае закаханым зберагчы і замацаваць трапяткія пачуцці.
На аўтарскім занятку, у святочна-утульнай атмасферы, будзеце маляваць на торбах сваіх лагодных Цмокаў. Файны будзе падарунак сабе, каханым і сябрам!
У суботу, 23 снежня, у музеі народнай архітэктуры і побыту ў Азярцы — свята «Прыйшлі Калядкі — бліны ды аладкі».
Святыя вечары, Крывыя вечары, Каляды — так называлі старажытныя святкаванні ў гонар зімовага сонцастаяння.
Паступова народныя традыцыі спалучыліся з хрысціянскімі — царква прымеркавала да гэтага дня рэлігійнае свята Нараджэння Хрыстова.
У залежнасці ад веравызнання Каляды святкуюцца ў розныя даты: у католікаў з 24 снежня па 6 студзеня і ў праваслаўных вернікаў з 6 па 19 студзеня.
Напярэдадні Калядаў з самай раніцы ў кожнай хаце старанна прыбіраліся, уся сям’я мылася, а потым пачыналі гатаваць вячэру.
Абавязковай абрадавай ежай была куцця — каша з таўчоных ячменных круп, якая сімвалізавала дабрабыт у будучым годзе.
Рыхтавалі пачастункі і для калядоўшчыкаў — гурта людзей, якія віншавалі гаспадароў са святам.
То прыходзьце і вы на Калядкі!
У нядзелю, 24 снежня, музей-запаведнік «Заслаўе» ладзіць новы калядны майстар-клас — гэтым разам па вырабе каляднай зоркі з лазы.
Вядоўца — майстрыня Ангеліна Каралёва.
Падчас стварэння гэтага незвычайнага ўпрыгожвання навагодняй елкі будзе самае месца для ўвасаблення творчай фантазіі, здольнасцей і трываласці.
Брэст
Гэтымі выходнымі, 23 і 24 снежня, у Брэсце — калядны Welcome Market! Кірмаш майстроў, garage sale, зносіны, музыка, святочная атмасфера і вялізная колькасць унікальных тавараў ад майстроў Брэста і гасцей з іншых гарадоў — карацей, ўсё як мы любім!
Гомель
23 снежня ў Гомелі ладзяць калядную этнавечарыну «Хрыстос нарадзіўся на вашым двары...».
Што будзе?
Цвік каляднай вечарыны — батлейка «Цар Ірад», п’еса па адным з самых папулярных біблейскіх сюжэтаў беларускай батлейкі.
Калядаванне — усе ахвотныя ператворацца ў калядоўшчыкаў і будуць атрымліваць за спевы салодкія падаруначкі (добра загадзя падрыхтавацца і падвучыць парачку калядак)
Традыцыйныя танцы пад гармонік і застолле!
Грузія
Батумі
25 снежня ў Батумі ў сямейнай атмасферы святкуюць Каляды! Спецыяльная падборка гульняў, у якія можна будзе навучыцца гуляць проста на месцы.
Адмыслова прыгатаваныя пад гэтую падзею вэлкам-дрынкі для ўсіх гасцей.
Калядная віктарына.
Музычны выступ беларускай скрыпачкі Марыны (@Marina_Violin), якая сыграе калядныя хіты і каверы на любімыя кампазіцыі.
Бярыце з сабой дзяцей, катоў, сабак, марскіх свінак і нават не кусачых кракадзілаў!
Тбілісі
Батлейка ад Маляваныча ў Тбілісі
23 снежня ў Тбілісі Маляваныч (Алесь Ждановіч) запрашае маленькіх і дарослых на святочную вечарыну. Удзельнікаў чакае аповед пра беларускую батлейку, казкі і гульні для дзяцей. А таксама спектакль «Цар Ірад», у якім вы пазнаеце некаторых сучасных гістарычных персанажаў, і ў якім самі возьмеце ўдзел!
Літва
Вільня
У суботу, 23 снежня, у Вільні з калядным канцэртам выступіць Зміцер Вайцюшкевіч.
25 снежня, у панядзелак, у Віленскай ратушы адбудзецца святочная імпрэза «Цуд на каляды» з удзелам выкшталцоных беларускіх артыстаў — спявачкі Маргарыты Ляўчук і піяніста Кірыла Кедука. Ва ўтульнай каляднай і пераднавагодняй атмасферы артысты выканаюць беларускія і еўрапейскія калядкі, а таксама творы Баха, Моцарта, Шапэна, Манюшкі, Штраўса і Бернстайна.
Польшча
Варшава
У суботу, 23 снежня, у Беларускім Моладзевым Хабе — уалядная ялінка для дзетак. Прыходзьце калядаваць, спяваць, танчыць, вадзіць карагоды, слухаць і глядзець на маленькіх талентаў, сустракаць Святога Мікалая з падарункамі.
23 снежня беларускія ды ўкраінскія рамеснікі запрашаюць на Калядны кірмаш у Варшаве!
Больш беларускіх падзей шукайце ў нашай Афішы.
Каб не прапусціць нічога цікавага, раім падпісацца на адмысловы
тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
Чытайце яшчэ:
