Калі вы раптам яшчэ не вызначыліся, як цікава і з карысцю правесці выходныя, мы падкажам. Арганны канцэрт у Мінску, калядная батлейка ў Раўбічах, навагодняя ялінка ў Дукоры, крысмас-тур па Гародні, калядная вандроўка з Алесем Чумаковым і Таццянай Ячнай у Вільні, беларускі Новы Год у Варшаве і Гданьску, канцэрты, майстар-класы, выставы, спектаклі — выбірайце падзеі ў сваім горадзе і на свой густ.
Мінск і Мінская вобласць
Мінск
Беларуская арганная спадчына: канцэрт Юрыя Габруся ў Мінску У суботу, 30 снежня, у касцёле святога Францішка Асізскага (каторы ў Новай Баравой) — новы арганны канцэрт ад Юрыя Габруся.
Прагучыць праграма, цалкам складзеная з арганнай спадчыны беларускай мінуўшчыны (XVI-XIX стагоддзі).
Кампазітары, творы якіх маюць прагучаць, паходзяць і з Беларусі, і з іншых краінаў, але ж лёс кожнага з іх цесна звязаны з нашай краінай, яе гісторыяй і музычнай культурай.
Раўбічы
У суботу, 30 снежня, у Раўбіцкім музеі беларускага народнага мастацтва калядная батлейка.
Пакажуць традыцыйны калядны спектакль «Цар Ірад».
Дукора
У аўторак, 2 студзеня, Дукорскі маёнтак запрашае на святочную ялінку.
Цягам усяго дня ладзяць шэраг анімацыйных экскурсій з любімымі героямі. Пан Маршалак, Дзед Мароз і Снягурка, калядныя Дзед і Каза і, канешне, Чорт запрашаюць:
патанчыць, пагуляць і пакалядаваць згодна з традыцыямі продкаў
падэгуставаць традыцыйныя напоі беларусаў і дакрануцца да тэхналогіі іх стварэння
палепшыць фізічны стан пасля святочнай ночы зімнімі забавамі і выпрабаваннямі
паспаборнічаць за прызы ад дукорскіх майстроў і мясцовай вінакурні
паўдзельнічаць у шэрагу калядных майстар-класаў і зрабіць сувенір на доўгую памяць.
Гродна
Музей гісторыі рэлігіі ладзіць традыцыйныя калядныя шпацыры па вуліцах Гародні.
Даведаецеся:
Калі на беларускіх землях з’явілася першая ялінка?
Як адзначалі Каляды ў Гродне 100 гадоў таму?
Хто прыносіў падарункі да з’яўлення Дзеда Мароза?
Чаму першыя хрысціяне не святкавалі дзень нараджэння?
Вось што вас чакае:
Экскурсія «Нараджэнне Хрыстовае: гісторыя і традыцыі» ў Музеі гісторыі рэлігіі;
Прагулка па калядных месцах горада;
Майстар-клас па стварэнні цацкі на ялінку;
Дэгустацыя аўтарскага дэсерту ў рэстаране «Мураўёў»;
Святочны канцэрт у лютэранскай кірсе.
Літва
Вільня
У суботу, 30 снежня, Беларуская Рада культуры запрашае на майстар-клас Вольгі Барышнікавай па калядных спевах беларусаў.
Вы даведаецеся пра традыцыйныя песні каляднага перыяду на беларускіх землях, паглядзіце фрагменты этнаграфічных фільмаў і паслухаеце песні ў іх сапраўдным аўтэнтычным гучанні.
Таксама будзе практычны спеўны майстар-клас, падчас якога вывучыце некалькі калядных песень, папрацуеце над гукам і, канешне ж, атрымаеце добры святочны настрой.
На суботу, 30 снежня, нічога не плануйце, бо ў Вільню прыбываюць з калядным канцэртам гусляр Алесь Чумакоў і спявачка Таццяна Ячная.
Вы пачуеце калядныя і навагоднія песні з Англіі, Ірландыі, Шатландыі, Уэльсу, Іспаніі, Італіі, Францыі, Даніі, Фінляндыі, Румыніі, Украіны, Беларусі, Латвіі, ЗША, Венесуэлы і, канешне ж, Польшчы.
Усе песні прагучаць беларускай мовай у перакладах беларускіх паэтаў ды пад акампанемент беларускіх гусляў.
Польшча
Варшава
У суботу, 30 снежня, у бары «Scena Chmielna» — святочны сямейны спектакль «Happy Peppi New Year».
«Happy Peppi New Year» — спектакль для ўсёй сям’і, для дзяцей і тых, хто адчувае сябе дзіценкам.
Новы год прапануюць сустракаць разам з Пэпі Доўгайпанчохай, якая цвёрда пастанавіла адсвяткаваць яго так, як ніхто і ніколі не святкаваў.
Вы даведаецеся, на якім дрэве растуць цукеркі, ці існуе дрэсіраваная сялёдка, як правільна ўпрыгожваць ялінку, а таксама — як любога тату пераўтварыць ў Дзеда Мароза.
Дапамагаць ей будуць добра выхаваныя Томі і Аніка.
Не абыдзецца без Паліцэйскага, які хоча забраць Пэппі у інтэрнат на выхаванне.
На спектаклі дазваляецца весяліцца, спяваць, стаяць на галаве, частавацца цукеркамі, лавіць рыбу.
Не дазваляецца быць занадта сур’езным і лётаць у аблоках без каскі.
У нядзелю, 31 снежня, беларусаў Варшавы клічуць святкаваць Новы год па-беларуску.
Прапануюць:
Unlim bar і ежа ў фармаце шведскага стала
Вялікі канцэрт гурта «Красная зелень» з Маргарытай Ляўчук і Андрэем Павуком.
Ноч танцаў пад зорны кавер-бэнд музыкаў з гуртоў Volski, Brutto, Ляпіс Трубяцкой, J:Mors, Крамбамбуля, Superbullz.
Музычныя сюрпрызы ад знакамітых гасцей з розных калектываў: Akute, Lear, Георгий Добро, Раман Арлоў і таемныя госці
Караоке да самай раніцы (а можа і болей)
Вядоўца — Аляксандр Памідораў!
Гданьск
Беларусы Гданьска традыцыйна збіраюцца сустрэць Новы год разам і гуляць да самай раніцы!
Удзельнікі будуць разам гатаваць навагоднія стравы (кожны ўдзельнік штосьці прыгатуе), упрыгожваць ялінку, знаёміцца і святкаваць!
Кракаў
У суботу, 30 снежня, беларусікаў Кракава клічуць на навагодні лялечны спектаклік «Казачны домік». Падчас спектакля вашых дзетак чакаюць Зайка-трусішка, касалапы Мішка, смелы Пеўнік, хітрая круцілька Ліса і дурны Воўк!
Разам з героямі будзем весяліцца, спяваць, танчыць, дапамагаць героям спраўляцца з цяжкасцямі і нават спячом самага сапраўднага калабка!
Рэкамендаваны ўзрост: ад 3 да 9 гадоў
Больш беларускіх падзей шукайце ў нашай Афішы.
Калі сярод прапанаваных варыянтаў не знайшлося нічога па душы, раім выправіцца ў вандроўку па Беларусі. Скласці цікавы маршрут дапаможа наша рубрыка «Вандруем разам».
Каб не прапусціць нічога цікавага, раім падпісацца на адмысловы тэлеграм-бот «Будзьма разам!», які дапамагае падпісчыкам незалежна ад месца пражывання даведацца пра беларускія мерапрыемствы ў сваім горадзе, краіне і нават па ўсім свеце!
А па гэтай спасылцы можна знайсці афішу бясплатных мерапрыемстваў.
