У галерэі “Ў” прайшла прэзентацыя альбома “Прэс-фота Беларусі — 2011”, у які ўвайшлі працы пераможцаў фотаконкурсу Belarus Press Photo. Рэдкі выпадак: самі журналісты давалі аўтографы, вядоўца імпрэзы Зміцер Вайцюшкевіч без перашкодаў спяваў песні са свайго рэпертуару, а паэт і палітык Уладзімір Някляеў прызнаўся, што ў маладосці марыў стаць фотамастаком.
“Мне падабаецца гартаць гэты фотаальбом”, — прызнаўся прысутным Зміцер Вайцюшкевіч, якога паклікалі на ролю вядоўцы прэзентацыі. Спявак пагадзіўся з радасцю, заявіўшы, што конкурсы для тых, хто імкнецца зафіксаваць нашае жыццё ў Беларусі, здараюцца нячаста, таму для яго гэта справа пачэсная.
- Зміцер Вайцюшкевіч
У альбом “Прэс-фота Беларусі — 2011” трапілі найлепшыя здымкі лаўрэатаў конкурсу — фатографаў як недзяржаўных, так і дзяржаўных СМІ. “Усе яны ўвайшлі ў гісторыю беларускай фотажурналістыкі”, — зазначыў сябра аргкамітэта, фатограф Вадзім Заміроўскі. Кіраўнік кампаніі “Zнята” Сяргей Міхаленка расказаў, што калі яны толькі пачыналі конкурс у 2010 годзе, то яшчэ не ведалі дакладна, дзеля каго і чаго тое робіцца. “Але цяпер, узяўшы ў рукі ўжо другі альбом, разумееш, што першы можа быць выпадковасцю, а другі — ужо тэндэнцыя. Таму абавязкова будзе і трэці, і чацверты, і пяты”. Да 19 лютага аргкамітэт Belarus Press Photo прымае працы ўдзельнікаў трэцяга конкурсу.
- Сяргей Гудзілін
На прэзентацыі фотаальбома была рэдкая магчымасць пачуць песні Змітра Вайцюшкевіча ўжывую. Музыка праспяваў некалькі сваіх твораў, павіншаваў усіх з тым, што “мы не здаемся і робім справу, каб перамагчы на гэтай зямлі”, ды разыграў колькі фотаальбомаў. На пытанне, хто аўтар фота на вокладцы “Прэс-фота Беларусі — 2011”, адказалі без цяжкасцяў. Тым больш што фатограф гэты праводзіў на паўгадзіны раней тут сваю аўтограф-сесію. Уладальнік Гран-пры конкурсу, супрацоўнік “Нашай Нівы” Сяргей Гудзілін расказаў пра свой здымак-пераможцу “Салдаты глядзяць “Панараму”. “На маю думку, гэтае фота яскрава адлюстроўвае стан беларускага грамадства”, — зазначыў Сяргей ды прызнаўся, што прыемна адчуваць сябе найлепшым фатографам года: “Клічце цяпер на вяселлі і карпаратывы”, — з усмешкай вымавіў ён.
- Уладзімір Някляеў
Сваё слова ўзяў і Уладзімір Някляеў. У гэты вечар паэт і палітык не чытаў сваіх твораў і не казаў урачыстых прамоваў, а проста падзякаваў журналістам за іх няпростую справу ды прызнаўся, што сам некалі марыў стаць фотамастаком. Пры канцы імпрэзы Зміцер Вайцюшкевіч пажадаў беларускай фотажурналістыцы квітнець. “Каб прыйшлі такія часы, калі папарацы будуць поўзаць на пузе і здымаць мяне голага на хутары”, — пад смех і апладысменты скончыў вядоўца прэзентацыю “Прэс-фота”.
Мікалай Дубавіцкі, фота – Зарына Кандрацьева
