Паводле рашэння Міністэрства інфармацыі з 16 траўня на тры месяцы прыпыняецца дзейнасць выдавецтваў ТАА «Лімарыус» і ПВУП «Кнігазбор».
Падставай для такога рашэння названа невыкананне тэрмінаў звароту ў ведамствы з паведамленнем аб змяненні звестак, якія падлягаюць уключэнню ў Дзяржаўны рэестр выдаўцоў, вытворцаў і распаўсюджвальнікаў друкаваных выданняў.
Раней па такой жа прычыне была прыпынена дзейнасць выдавецтваў «Медысонт» і «Галіяфы».
ТАА «Лімарыус» займалася выданнем навуковай, метадычнай і класічнай мастацкай літаратуры, у асноўным на беларускай мове. Заснавальнікам выдавецтва з’яўляецца палітзняволены філолагі палітолаг Аляксандр Фядута, які зараз знаходзіцца ў СІЗА КДБ па абвінавачанні ў змове з мэтай захопу ўлады неканстытуцыйным шляхам.
«Кнігазбор» займаўся выданнем беларускамоўнай літаратуры: твораў сучасных аўтараў, класікаў беларускай літаратуры, кніг для дзетак. Нагадаем, з праверкай ў студзені мінулага года ў выдавецтва прыходзіў АБЭП, дырэктара Генадзя Вінярскага выклікалі на допыт у ДФР, былі заблакаваныя рахункі выдавецтва, але пазней справу закрылі.
«27 гадоў займаюся выдавецкай дзейнасцю і кірую выдавецтвам. Выпадкова даведаўся, што дзейнасць Кнігазбора прыпынілі на 3 месяцы», — напісаў Генадзь Вінярскі на сваёй старонцы ў Фэйсбук.
