29.07.2023 | Навіны "Будзьма!" Гатуем з «Будзьма!»

Што рабіць з кабачкамі? Гатуем летняе рагу з гародніны

Кожнае лета сярод беларусаў адбываецца ўжо традыцыйны «чэлендж» з перадорваннем кабачкоў. Дык што ж прыгатаваць з гэтай дзіўнай гародніны? Прапануем лёгкі летні рэцэпт рагу з інгрэдыентаў, большасць з якіх расце ў нас на лецішчах.

Калі кабачкі з’явіліся на беларускіх землях

На думку навукоўцаў, радзімай кабачкоў з’яўляецца Цэнтральная Амерыка, дзе іх пачалі культываваць у якасці агароднай культуры яшчэ 5 тыс. гадоў таму. На еўрапейскі кантынент кабачок патрапіў у эпоху Вялікіх геаграфічных адкрыццяў толькі ў XVI ст., і ніхто тады не думаў ужываць гэты плод у ежу. Першапачаткова кабачкі вырошчвалі як дэкаратыўную культуру.

Калі кабачок дабраўся да нашых земляў, то ён тут вельмі добра прыжыўся і даваў вялікую колькасць пладоў. Нашыя продкі першапачаткова называлі кабачок гарбузом і кармілі ім хатніх свінак. І толькі потым пачалі гатаваць з кабачка і гарбуза розныя стравы. З іх варылі кашы, дадавалі ў супы або тушылі з іншай гароднінай ці мясам.

Чытайце яшчэ:

Каша з гарбуза — карысны і смачны сняданак

Як прыгатаваць рагу з кабачкамі

Лепш за ўсё гатаваць маладыя кабачкі. Калі ж у вас пераспелы кабачок, то пачысціце яго ад скуркі і выдаліце семкі.

Мы выкарыстоўвалі ў рэцэпце курынае філе, але ў страву можна дадаваць любое мяса ці мясныя вырабы на ваш густ. А можна гатаваць і без мяса, таксама будзе смачна.

Кабачок і памідор парэзаць на кубікі. Моркву — на паўкольцы. Перац пачысціць ад семак і парэзаць кубікамі. Здрабніць часнок.
Курынае філе парэзаць на кубікі. Абсмажыць на разагрэтым алеі да з’яўлення лёгкай залацістасці. Прыперчыць па смаку.
Моркву прысмажыць на слабым агні каля 5 хвілін разам з мясам.
Дадаць кабачок, праз 5 хвілін — парэзаную цыбулю.
Дадаць перац, памідор, соль па смаку.
Праз 5 хвілін наліць крыху вады і да стравы далучыць часнок і пятрушку.
Тушыць 5 хвілін. Пры падачы можна ўпрыгожыць насечанай зялёнай цыбуляй.

Смачна есці!

Нам спатрэбіцца: