Пра гэта паведаміў Міністр культуры Украіны Аляксандр Ткачэнка ў сваім тэлеграм-канале.

У выніку абстрэлу Кіева пацярпеў будынак філармоніі, Нацыянальны музей мастацтваў імя Багдана і Барбары Ханенкаў, а таксама музей Тараса Шаўчэнкі. Пачытайце гісторыю гэтых будынкаў і паглядзіце, як яны выглядалі да вайны.

Будынак нацыянальнай філармоніі Украіны

Гэты будынак быў узведзены ў 1882 годзе, у ім адбываліся балі-маскарады, сямейныя святы, дабрачынныя латарэі, літаратурныя і музычныя вечарыны, а ў 1890-я гады ранішнія канцэрты камернай музыкі. Дзейнасць філармоніі не прыпынялася нават у часы Першай Сусветнай і Грамадзянскай войнаў. А вось у часы Другой Сусветнай вайны, ужо ў 1941 годзе філармонія спыніла сваю дзейнасць, але аднавіла ў 1944. У 1980-я гады ў будынку адбыўся шэраг аварый і затапленняў, з-за чаго былі страчаныя каштоўныя архівы.

Нацыянальны музей мастацтваў імя Багдана і Барбары Ханенкаў

Мастацкі музей, у экспазіцыі якога прадстаўлены найбуйнейшыя ў краіне калекцыі твораў мастацтва Еўропы, Азіі і Старажытнага свету.

Музей быў заснаваны ў 1919 годзе паводле завяшчання калекцыянера Багдана Ханенкі і яго жонкі Барбары на імя Усеўкраінскай акадэміі навук. Асновай калекцыі музея паслужыла прыватная калекцыя мастацтва Багдана і Барбары Ханенкаў — выбітных ўкраінскіх калекцыянераў і мецэнатаў канца ХІХ — пачатку ХХ стагоддзя.

Улетку 1941 года, з пачаткам ваенных дзеянняў на тэрыторыі Савецкага Саюза, найбольш каштоўную частку музейнай калекцыі эвакуіравалі ва Уфу. З твораў, якія засталіся ў Кіеве, нацысты адабралі самыя каштоўныя і вывезлі іх з Украіны пры адступленні 1943 года. Сёння музей прыкладвае намаганні да пошуку і вяртання выкрадзеных каштоўнасцяў.

З 1986 па 1998 гады ў будынку праводзілі капітальны рамонт.

Так выглядае будынак пасля ракетных удараў. Фота: ТИМОШЕНКО.Офіс

Сёння ў фондах Музея Ханенкі захоўваецца больш за 25 000 прадметаў. Сярод іх каштоўныя прыклады мастацтва Ірана, Тыбету, Кітая, Японіі, Старажытнага Егіпта, Старажытнай Грэцыі і Рыма. Каля 1000 абраных артэфактаў ўваходзяць у пастаянную экспазіцыю.

Нацыянальны музей Тараса Шаўчэнкі

У 1940 годзе Савет Народных Камісараў УССР пастанавіў арганізаваць у Кіеве на базе Рэспубліканскай юбілейнай выставы Цэнтральны дзяржаўны музей імя Тараса Шаўчэнкі, засяродзіўшы тут усе арыгінальныя матэрыялы, звязаныя з жыццём і творчасцю літаратара. Згодна з пастановай усе матэрыялы з выставы, прадстаўленыя рознымі музеямі і ўстановамі, былі замацаваны за музеем, экспазіцыя якога была адкрыта ў красавіку 1941 года ў памяшканні Марыінскага палаца. Сабрана было каля 10 000 экспанатаў.

Дзейнасць музея была спынена з пачаткам вайны. Каштоўныя экспанаты ўдалося перад нямецкай акупацыяй эвакуіраваць у Новасібірск, іх вярнулі ва Украіну ў 1944 годзе. 24 красавіка 1949 года была адкрыта новая экспазіцыя ў вылучаным урадам памяшканні па бульвары Шаўчэнкі, 12, куды сёння і патрапіла ракета.

У музеі пасля абстрэлу. Фота з Фэйсбуку

Колькі культурніцкіх будынкаў пашкодзілі абстрэламі з 24 лютага?

Па стане на 5 кастрычніка, згодна інфармацыі ЮНЕСКА, з 24 лютага былі пашкоджаныя 199 аб’ектаў культуры. З іх — 84 рэлігійныя будынкі, 13 музеяў, 37 гістарычных будынкаў, 37 будынкаў, прызначаных для культурнай дзейнасці, 18 помнікаў і 10 бібліятэк.

АМ, budzma.org