Беларускі гурт Relikt выдаў альбом «Byli, Jość, Budziem». Рэліз без перабольшання можна назваць скарбонкай беларускага рока — на ім змясціліся кампазіцыі культавых гуртоў і выканаўцаў з 80-90 гадоў мінулага стагоддзя: «Мроя», ULIS, «Бонда», «Камэлот», Сяржук Сокалаў-Воюш і іншых.
«Многія раслі на беларускай музыцы, але, на жаль, з цягам часу старыя стужкі заціраюцца і апынаюцца на сметніку, а добрае забываецца. І ўсё ж так быць не павінна — трэба захоўваць успаміны пра шчаслівую будучыню, якімі жылі таленавітыя беларусы, нашы гіганты, у часы, калі краіна дыхала паветрам Адраджэння», — адзначае лідар Relikt бубнач Аляксандр Дземідзенка.
Сярод іншых у скаладанцы можна пачуць перасэнсаваныя ў розных музычных стылях ад пост-панка да пост-рока і сучасна запісаныя каверы «Atlantyda», «Plac Francyska», «Kraina taleraŭ», «Ja žyŭ», «Biełaruś maja»...
На вокладцы «Byli, Jość, Budziem» змешчаны стылізаваны партрэт культавага беларускага музычнага журналіста і крытыка Вітаўта Мартыненкі.
«Гэтым альбомам мы хацелі аддаць даніну павагі не толькі „генералам айчыннага року“, але і такім асобам, як, напрыклад, Анатоль Мяльгуй, Вітаўт Мартыненка, Сяргей Філімонаў, Уладзімір Пучынскі — усім тым, хто рупіўся на ніве Беларушчыны», — падкрэслівае Аляксандр Дземідзенка.
Паслухаць і спампаваць альбом можна тут.
Relikt. Фатограф Jenet Bonishi
Зараз гурт базуецца ў Польшчы і мае шэраг запланаваных на лета канцэртаў, наступны з якіх адбудзецца у Garage Pub у Кракаве 4 жніўня.
Relikt — беларускі гурт, які знітоўвае сёння і мінулае, паказваючы яго ў нязвыклым выглядзе і робячы актуальным для слухачоў, якія шукаюць у музыцы нешта новае.
У дыскаграфіі каманды 8 студыйных альбомаў, 2 канцэртныя DVD і 13 відэакліпаў, музыка да фільма «У агні народжная», а таксама гімн футбольнага клуба «Крумкачы». Гурт атрымаў шэраг музычных узнагарод у Польшчы і Беларусі (Гран-пры — фестываль Jesień Bardów, Гран-пры і прыз глядацкіх сімпатый — фестываль Rockowisko Hajnowka, «Альбом года», «Лепшы рок-альбом», «Артыст года» і шмат іншых, неаднаразова выступаў ва Украіне і Літве.
Чытайце яшчэ:
Бубнач гурта Relikt Алесь Дземідзенка: «Мы — беларусы — такія як ёсць. Іншых не будзе. Трэба лаяльней ставіцца адно да аднаго»
