Вядома, што раней каляндарны год у нашых продкаў пачынаўся зусім не ўзімку, але з надыходам вясны. І традыцыйных песняў, прысвечаных вясне, захавалася безліч. Сёння ўзгадаем некаторыя з іх разам з трэкамі сучасных беларускіх музыкаў.

Крыніца: damion.club

Hvarna — Viasna, dzie buvała

Пачнем нашую падборку з вясновай песні з чароўнага альбома гурта Hvarna «Koła Viartańniaŭ», выдадзенага ў 2010 годзе. Гурт Hvarna — праект беларускага музыкі Андруся Палаўчэні (OSIMIRA, Pragnavit) і музыкаў з гурта «Абярэг». Альбом заснаваны на песнях Крывіі і фіна-вугорскіх поўночных тэрыторый. Адметнасцю праекта з’яўляецца спалучэнне беларускай дуды і гусляў ды процьмы іншых традыцыйных інструментаў. Музыкі пакінулі тэксты некранутымі, але аздобілі іх асаблівай музычнай інтэрпрэтацыяй, якая таксама стварае магічную атмасферу адчування свету продкаў. Настойліва раім праслухаць увесь альбом, а пачаць будзе дарэчы з вясновай песні «Viasna, dzie buvała».

Крамбамбуля — «Вясна ў тваіх вачах» 

Песня з чацвёртага студыйнага альбома «Крамбамбулі» «Святочная», выдадзенага ў далёкім 2007 годзе. Альбом канцэптуальны, прысвечаны разнастайным святам, папулярным і не вельмі, падчас святкавання якіх у постсавецкай Беларусі было прынята слухаць расійскую папсу ці савецкія хіты. Музыкі «Крамбамбулі» паспрабавалі стварыць святочную папсовую альтэрнатыву па-беларуску, і ў іх гэта выдатна атрымалася. Лёгкія яскравыя тэксты, аздобленыя выкшталцонай іроніяй Лявона Вольскага, музыка, створаная пры ўдзеле шматлікіх музыкаў ахапіла разнастайныя стылі — усё атрымалася арганічна. Сёння з нагоды вясны ўзгадаем трэк з альбома, які прысвечаны 1 траўня — «Вясна ў тваіх вачах». 

Зміцер Вайцюшкевіч і WZ-Orkiestra — «Красуня-Вясна»

Добры трэк з першага аднайменнага альбома гурта «Людзі на балоце», выдадзенага ў 2012 годзе. Кампазіцыя з’яўляецца завяршальнай у вельмі цяжкім, напружаным што да эмоцыяў альбоме, прысвечаным гістарычным падзеям у Беларусі першай паловы ХХ стагоддзя. Яна спяваецца ўжо ад імя сучаснага чалавека, які рэфлексуе пра той няпросты час і спадзяецца на лепшае. Песня трошку наіўная, але менавіта такога простага, шчырага акурат часта і хочацца, перажыўшы ўсе нягоды і выпрабаванні, якія выпадаюць на лёс чалавека. 

Sounduk — «Вясна»

Добрая нагода ўзгадаць і першы трэк па-беларуску гурта Sounduk, запісаны Ганнай Хітрык у 2012 годзе. Натхніла спявачку Б’ёрк, якую на момант нараджэння песні слухала Ганна Хітрык, і прадчуванне хуткай вясны. Трэк атрымаўся чулым, шчырым, меладычным, як і ўся творчасць гурта Sounduk. 

ZnaROCK — «Красавік»

Варта ўзгадаць і яшчэ адзін трэк пад назвай «Красавік» — ад спявачкі Паліны Рэспублікі з амаль аднайменнага альбома «Бясконцы красавік», выдадзенага ў 2015 годзе. Песня вясновая, чуллівая, пра маладосць, каханне, трошку сум і тугу, якой аздабляецца вясновае пачуццё ў юнацтве. Спявачка вырашыла прадставіць трэк у выглядзе самотніка акурат на свой дзень народзінаў — 8 красавіка, калі ёй споўніўся 21 год. Іншыя трэкі перыяду «Паліны Рэспублікі» пару тыдняў таму спявачка Palina выклала на стрымінгі. Добрая нагода паслухаць і «Красавік».

Omut — «Вясна» 

Аматарам фолк-металу даспадобы прыйдзецца трэк «Вясна» з першага альбома гурта Omut «Дзесяць шляхоў праз дрыгву», выдадзенага ў 2014 годзе. Спалучэнне традыцыйных інструментаў ды спеваў разам з цяжкімі музычнымі стылямі — усё вытрымана ў зададзенай стылістыцы ад пачатку і да апошніх нотаў. Песня пра абуджэнне зямлі, прыроды і чалавека.

Akute — «Вечная вясна» 

Вясновая песня з чацвёртага студыйнага альбома гурта Akute «Płastyka», выдадзенага ў 2016 годзе. Трэк меладычны, вытрыманы ў стылістыцы гурта, прысвечаны каханню і сумным настальгічным пачуццям, стомленасці з нагоды завяршэння стасункаў. Прыйдзецца даспадобы ўсім аматарам меладычнага року і «дыска-дэкадансу, уласцівага для гэтага вельмі паслядоўнага магілёўскага гурта». 

Кацярына Ваданосава і Fantasy Orchestra — «Вясна»

Жыццесцвярджальны сінгл «Вясна» быў выдадзены Кацярынай Ваданосавай і яе гуртом Fantasy Orchestra ў 2017 годзе. «Вясна — час абнаўленьня, час зьменаў, час быць шчасьлівымі, не зважаючы ні на якія перашкоды. Час выходзіць з дамоў і сустракацца з сапраўдным жыцьцём! Час быць сапраўднымі, узнёслымі, сьмелымі ды гераічнымі! Час квітнець, час сьпяваць, час рабіць сьвет прыгажэйшым!» — з такімі думкамі музыкі запісвалі твор. 

Віктар Шалкевіч — «Вясна-блюз» 

Песня самага «трушнага» гарадзенскага барда, запісаная поўным гукам для ягонага альбома, якога прыхільнікі чакалі 15 гадоў і дачакаліся ў 2019 годзе. Рэліз песні аўтар і выканаўца суправадзіў такой гісторыяй: «Мой стары знаёмы, беластоцкі паліцыянт Пётар Рудніцкі, так любіў Вясну, да таго любіў, што аднойчы ў размове, прыкрыўшы вочы, задэклараваў: “Umrę na wiosnę!”. Але “na wiosnę” жыцьцё толькі пачынаецца, “na wiosnę” трэба варушыць карэннямі, выпускаць з сябе першыя клейкія зялёныя лісточкі, расцьвітаць, харашэць, пхнуцца ўгору, ушыркі, рабіць неверагодна ашаламляльныя і, на першы погляд, малакарысныя справы! Вясна авансам дае кожнаму з нас столькі магчымасьцяў, столькі надзеяў… аж занадта! Але ня кожны з нас, на жаль, ашаломлены і атручаны сакавіцкім паветрам, сонечным зьзяньнем і птушынымі вяртаньнямі, патрапіць выкарыстаць хоць частку таго, што звальваецца на яго Ўвесну! Прыходзіцца некаторыя меней пільныя справы адкладаць на другую Вясну, трэцюю ці чацьвёртую…». 

Бачу ўпершыню — «Менск вясной» 

Ад класіка беларускай бардаўскай песні рэзка пераходзім да сучаснага гучання і гурта «Бачу ўпершыню», песняй якога і завершым сваю вясновую музычную падборку. Трэк «Менск вясной» напоўнены сапраўднай энергіяй вясны, маладосці і прагай жыцця. Сучаснае поп-рок гучанне, юнацкі вакал і немудрагелісты тэкст з запамінальным прыпевам робяць яго сапраўдным хітом, якому пасавала б гучаць з кожнага дынаміка. Рэліз песні адбыўся летась акурат увесну, да трэку было знятае маляўнічае відэа. «Песня пра Мінск, якую прысвячаем тым, хто бачыць беларускую сталіцу толькі па фота і ў снах і тым, хто ходзіць па вуліцах горада і бачыць яго вясновыя колеры», — такімі словама прэзентавалі сваю працу музыкі. 

Аглядальнік, budzma.org