Беларускія нямыя кінафільмы «Прастытутка» з жывой музыкай гурта Ilo&friends і «У агні народжаная» з жывой музыкай гурта Re1ikt пакажуць у Беластоку і Тэрэспалі.

Дагэтуль у Польшчы ў межах праекту «Тузін. Немаўля» прэзэнтавалітолькі фільмы «Кастусь Каліноўскі» ды «У агні народжаная». Так што паказ «Прастытуткі» ў Беластоку будзе прэм’ерным.  Разам з паказам фільму, да якога музыку зайграе аўтары саўндтрэку – беластоцкі гурт Ilo&friends –адбудзецца прэм’ера DVD-выданьня, якое ўключае тры фільмы з адмыслова напісанай і запісанай музыкай. Таксама ў гэты дзень адбудзецца выстава самых цікавых плакатаў да беларускага нямога кіно 20-тых і 30-тых гадоў з калекцыі Музея беларускага кіно ў Менску.

Кінаканцэрт адбудзецца 13 сьнежня ў камэрнай залі Падляшскай опэры і філярмоніі-Эўрапейскім цэнтры мастацтва ў Беластоку, што па вуліцы Адэскай, 1.

На наступны дзень праект «Тузін. Немаўля» завітае ў Тэрэспаль.  Гурт Re1ikt з фільмам «У агні народжаная» (1929) зайграе ўпершыню ў гэтым польскім горадзе, які знаходзіцца побач зь беларускай мяжой. Прэзэнтацыя фільму ды адначасова DVD-выданьня з трыма нямымі фільмамі ды сучасна напісанай да іх музыкай пройдзе 14 сьнежня ў «Галерэі смакаў». У час мерапрыемства таксама можна паглядзець абраныя плякаты да нямых беларускіх фільмаў 20-тых і 30-тых гадоў. Партнэрам паказу зьяўляецца Гарадскі асародак культуры ў Тэрэспалі ды рэстаран «Галерэя смакаў».

Нагадаем, што 14 сьнежня яшчэ адна стужка з праекту «Тузін.Немаўля» – «Кастусь Каліноўскі» будзе паказана ў віцебскім клюбе «Чердачок» у музычным суправаджэньні Сяргея Пукста.

Не выключана таксама, што праект будзе прадстаўлены ў сьнежні і ў Берасьце.

Сачыце за навінамі!

Tuzin.fm