Калі нехта з замілаваннем узгадвае школьныя гады і хоча пасядзець за школьнай партай сярэдзіны ХХ ст., а таксама “прычасціцца” розгамі на школьнай лаве, – то гэта выстава акурат для яго.   Прыкладна паўтысячы экспанатаў, а гэта не толькі старыя канспекты, падручнікі і фотаздымкі, ілюструюць развіццё адукацыі на Гродзеншчыне пачынаючы з ХІІ стагоддзя і да канца савецкай эпохі.

Шмат месца прысвечана навучальным установам часоў Рэчы Паспалітай – гродзенскаму езуіцкаму калегіуму і дзейнасці Адукацыйнай камісіі ў Вялікім Княстве Літоўскім.   Сярод знакамітых выпускнікоў Гродзенскай мужчынскай гімназіі – фатограф ды рэвалюцыянер Пётр Шумаў, філосаф Аляксандр Макавельскі, беларускі каталіцкі ксёндз Вінцэнт Гадлеўскі.

А шматлікія выпускнікі Свіслацкай настаўніцткай семінарыі, якіх выхоўвалі ў духу падданасці цару Мікалаю ІІ, сталі пасля Першай сусветнай вайны беларускімі актывістамі і змагаліся за беларускую школу ў шэрагах Таварыства беларускай школы.

Дарэчы, на выставе можна пабачыць і фотаздымкі вучняў першай беларускай школы ў Гродне, якая паўстала сто гадоў таму, у красавіку 1916 г.   Савецкая школа паказана атмасферна – пачынаючы ад пасляваенных плакатаў са школьнікамі і заканчваючы школьнай формай 1980-х гг.

Іван Плебанец, Твой стыль