Беларускі-брытанскі тэатральны рэжысёр і акцёр Уладзімір Шчэрбань, вядомы апошнім часам як стваральнік сотняў па-майстэрску зробленых арт-рэплік, анасаваў працяг свайго нашумелага праекта «The Art life Project». Гэтым разам тэатральны дзеяч і актывіст плануе пераўвасобіць творы беларускіх незалежных мастакоў, а гэтаксама зрабіць арт-рэплікі карцін са збору Беларускай бібліятэкі імузея імя Францішка Скарыны ў Лондане, піша reform-by.

Арт-рэпліка Уладзіміра Шчэрбаня на карціну мастачкі Марэўны «Марк Шагал».
Фота: фэйсбук Уладзіміра Шчэрбаня

Мастацкі дырэктар HUNCHtheatre лічыць, што стварэнне арт-рэплік — гэта спраўднае мастацтва. «Унікальнае спалучэнне жывапісу, тэатра, фатаграфіі і ілюзіі», — падкрэслівае рэжысёр.

Уладзімір Шчэрбань захапіўся гэтым незвычайным хобі ў час пандэміі, калі на паузу была паўстаўлена дзейнасць яго тэатра. Лічы, дзеля жарту, рэжысёр пачаў ствараць арт-рэплікі на творы мастацтва, далучыўшыся да адмысловай групы ў сацсетках, пакуль... Пакуль захапленне нечакана не перарасло ў паўнавартасны праект з колам сваёй публікі ды, можна сказаць, гледачоў. Пры тым, што рэжысёр рабіў пераўвасабленні вядомых карцін і скульптур з дапамогай падручных сродкаў, а гэтаксама на старую тэхніку. Але справа, вядома, у іншым — у шчырым захапленні і адданасці ідэі стварэнне цэлага свету ў адной рэпліцы-фатаграфіі.

Арт-рэпліка Уладзіміра Шчэрбаня на карціну Ван Гога «Аўтапартрэт у саламяным капялюшы».
Фота:фейсбук Уладзіміра Шчэрбаня

Як вынік — за тры гады беларуска-брытанскі аўтар зрабіў больш за сто арт-рэплік, звярнуўшы на сваю дзейнасці ўвагу не толькі тысячы аматараў мастацтва, а прафесіяналаў і музеяў. Скажам, яго майстэрства і выдумку адзначыў вядомы французскі ілюстратар Жэрар Дзюбуа, не засталася абыякавай да творчасці акцёра Сью Цілі, любімая мадэль мастака Люсьена Фрэйда. Падтрымка многіх і многіх людзей заахвоціла рэжысёра працягнуць праект.

Сёлета Уладзімір Шчэрбань запланаваў два новых цыклы.

«Я хачу пазнаёміць [публіку] з творчасцю незалежных беларускіх мастакоў: як тых майстроў, якія адбыліся, так і тых, хто пачынае», — падзяліўся ён у сацсетках.

Ды гэтаксама тэатральны дзеч хоча прадставіць гледачам творы — «візуальныя перліны» — з Беларускай бібліятэкі Францішка Скарыны ў Лондане.

Арт-рэпліка Уладзіміра Шчэрбаня на карціну мастака Франса Халса «Кавалер, які смяецца».
Фота: фейсбук Уладзіміра Шчэрбаня

«Кожны этап стварэння арт-рэплікі стане ўнікальным і выйдзе за межы выявы як такой. Я хачу дзеля пераўвасаблення запрашаць цікавых людзей са ўсяго свету, у працэсе рабіць з імі — па магчымасці, з мастакамі, скульптарамі — інтэрв’ю», — паведаміў пра пашырэнне фармату творца.

Каб планы сталі рэальнасцю, спадар Уладзімір звярнуўся да дапамогу да публікі. Акцёру неабходны сродкі на набыццё новага камп’ютара з праграмай па працы з выявамі і відэа, мікрафон. Аўтар самастойна ужо набыў новую лепшую камеру.

«Я буду вельмі ўдзячны за любы ўнёсак у гэты вельмі важны для мяне праект, і гарантую рэгулярна знаёміць вас з цікавымі людзьмі, і, канешне, працягну радаваць новымі арт-рэплікамі на творы мастацтва, у якіх заключаны вельмі важны, бясцэнны досвед чалавецтва, — звярнуўся да свойго гледача Уладзімір Шчэрбань. — Менавіта мастацтва выратуе свет — праверана на асабістым досведзе», — зазначыў ён.

Уладзімір Шчэрбань. Фота: фейсбук Уладзіміра Шчэрбаня

Сачыць за «тэатрам у мастацтве» беларускага аўтара можна тут і тут.

Падтрымаць праект тут.