20 снежня завяршыўся першы этап рэалізацыі праекта MOVABOX – маштабнай ініцыятывы кампаніі velcom, прысвечанай падтрымцы беларускай культуры, мовы і літаратуры. Арганізатары падвялі вынікі мінулых васьмi тыдняў, а таксама абвясцілі, якому аўтару і якому твору будзе прысвечаны наступны MOVABOX. Гэта Альгерд Бахарэвіч і яго казка-антыўтопія «Дзеці Аліндаркі». Ужо зараз на абноўленым сайце movabox.by можна прайсці тэст па гэтым творы і пазмагацца за эксклюзіўны набор з кнiгi і звязаных з ёю артэфактаў.
MOVABOX – гэта вялікі інтэрактыўны праект, які спалучае магчымасці анлайн-камунікацыі і класічнае ўспрыманне друкаванай кнігі як каштоўнасці. Яго мэта – пазнаёміць шырокую аўдыторыю з сучаснымі беларускімі пісьменнікамі і іх творамі, прадэманстраваць, што беларускі літаратурны працэс разнастайны і цікавы ў міжнародным кантэксце. Кожны з чатырох этапаў, з якіх складаецца праект, знаёміць чытачоў з той ці іншай кнігай аднаго з сучасных беларускіх аўтараў і, разам з тым, імкнецца абудзіць больш пільную ўвагу да беларускай літаратуры ўвогуле.
Кожны твор, на базе якога будуюцца асноўныя падзеі праекта, ператвараецца ў асобны MOVABOX – унікальны набор, у які ўваходзяць кніга і звязаныя з ёй артэфакты. Апошнія восем тыдняў агульная ўвага была прыцягнута да кнігі Людмілы Рублеўскай «Авантуры студыёзуса Вырвіча» – прыгодніцкага рамана ў жанры гістарычнага фэнтэзі, сюжэт якога разгортваецца вакол персоны шляхціца Пранціша Вырвіча і яго спадарожніка доктара Баўтрамея Лёдніка. Дарэчы, вызначылася, што за гэтыя восем тыдняў сайт movabox.by наведалі 20 206 чалавек, сярод якіх 7 285 прайшлі тэст, а 4 270 прынялі ўдзел у розыгрышы скрыні MOVABOX з артэфактамі.
«Старт праекта MOVABOX склаўся менавіта так, як нам хацелася: яго заўважылі, успрынялі з цікавасцю і прыязнасцю. Аб гэтым можна меркаваць і па шматлікіх публікацыях у СМІ і сацыяльных сетках, і па колькасці наведвальнікаў інтэрнэт-старонкі праекта, і па тым, як актыўна яны праходзілі тэст, прысвечаны тэматыцы першага MOVABOX. Не засталася незаўважанай і «афлайн»-частка праекта: усталяваныя у кавярнях Мінска і іншых гарадоў боксы для буккросінгу таксама карыстаюцца папулярнасцю сярод наведвальнікаў, якія з задавальненнем чытаюць прапанаваныя кнігі і часопісы з творамі сучасных беларускіх пісьменнікаў», – распавёў кіраўнік аддзелу брэнд-менеджменту velcom Зміцер Курловіч.
«Эстафету» удзелу ў праекце прыняў беларускі пісьменнік Альгерд Бахарэвіч. Прайшоўшы тэст па яго кнізе на сайце www.movabox.by можна ўдзельнічаць у розыгрышы MOVABOX з артэфактамі па «Дзецях Аліндаркі». Сярод iх вы знойдзеце ліхтарык, дарожную гульню, лясную шышку, мазь «Зорачка» як сродак ад камароў, салодкія «вітаміны» і рэцэпт на іх, кавалачак гліны для лепкі і пасланне ад аўтара. Выбар артэфактаў, як і ў мінулы раз, абумоўлены сюжэтам кнігі: у «Дзецях Аліндаркі» галоўныя героі – дзяўчынка і гліняны хлопчык – спрабуюць на лясных сцежках адшукаць саміх сябе. Дарэчы, за раман «Дзецi Аліндаркі» пісьменнік атрымаў званне лаўрэата прэміі імя Ежы Гедройца ў 2015 годзе.
«Галоўнае, што робіць праект MOVABOX, – ён дапамагае сучаснай беларускай літаратуры існаваць для сапраўднага, а не ўяўнага чытача. Толькі так напісанае слова застаецца жывым: калі знаходзяцца тыя, хто прачытае і зразумее яго. Я шчыра ўдзячны за магчымасць удзельнічаць у гэтым праекце і лічу, што MOVABOX на самой справе здольны дапамагчы сапраўдным «дзецям Аліндаркі» знайсці сваю сцежачку праз лес», – адзначыў Альгерд Бахарэвіч.
Таксама падчас мерапрыемства першая скрыня для буккросінга MOVABOX, усталяваная ў кавярні «Утопія 60», папоўнілася раманам Альгерда Бахарэвіча «Белая муха, забойца мужчын» з аўтографам аўтара. Да канца года кніга з’явіцца і ў іншых кавярнях, дзе ўсталяваныя скрыні для буккросінга. Азнаёміцца з поўным спісам можна тут.
Аўтар першага MOVABOX Людміла Рублеўская таксама падзялiлася сваiмi ўражаннямi ад праекта: «Досвед удзелу ў праекце атрымаўся для мяне вельмі цікавым. Перш за ўсё я ўдзячная яму за саму ідэю наблізіць беларускую літаратуру да чытача праз нечаканы фармат камунікацыі. У тым, што гэта працуе, я пераканалася на ўласным досведзе: лепшым доказам для мяне сталі ўсе тыя добрыя словы і станоўчыя водгукі, якія давялося пачуць ад знаёмых і незнаёмых людзей за апошнія тыднi».
MOVABOX – новы праект velcom, накіраваны на падтрымку беларускай культуры. Дзейнасць у гэтым напрамку з’яўляецца важнай часткай карпаратыўнай сацыяльнай адказнасці кампаніі. Сярод адметных праектаў – адукацыйная ініцыятыва «Чытаем па-беларуску з velcom», праект «Музей дзецям з velcom» сумесна з Нацыянальным гістарычным музеем, цыкл «1000 музеяў Беларусі» і іншыя. Інфармацыйны партнёр праекта MOVABOX – грамадская культурніцкая кампанія «Будзьма беларусамі!». Партнёры праекта – партал беларускіх электронных кніг kniharnia.by і бясплатныя курсы беларускай мовы «Мова нанова».
