Алесь Тодараў разбіраецца на budzma.org з тым, што такое візуалізацыя мыслення і як яна можа дапамагчы ў ажыццяўленні жыццёвых мэтаў.
Кожнае прамоўленае слова нясе пэўны энергетычны і эмацыянальны мэсыдж. Ад таго, што вы думаеце і кажаце, залежыць не толькі ваш настрой, але і вашая рэальнасць. Прасцей кажучы, вашае жыццё — гэта той вобраз, які існуе ў вашай галаве і які вы транслюеце вонкі.
Памятайце аб тым, што словы — гэта фарба, якой вы малюеце сваю рэальнасць. Выбірайце іх свядома, каб стварыць тое жыццё, якое хацелася б пражыць менавіта вам.
Што такое візуалізацыя?
Большасць з нас лепш за ўсё ўспрымае інфармацыю візуальна. А значыць, калі вы здолееце ясна вызначыць уласныя мэты і выразна іх прадставіць, то прытрымлівацца плана па іх дасягненні будзе ў разы прасцей.
Рэгулярна ўяўляйце, як вы здзяйсняеце вызначаныя дзеянні, каб выканаць пастаўленыя перад сабой задачы, а не толькі ўяўляйце вынік. Так вы будзеце канцэнтравацца на спосабах дасягнення мэт, а не толькі на фінале. Ваш мозг не можа адрозніць уяўных сітуацый і абставін ад рэальных. Выкарыстоўвайце гэтую асаблівасць для пашырэння свайго ментальнага досведу.
Уяўляйце сябе ў розных сітуацыях так, як вы хацелі б сябе ў іх паводзіць — гэта прывядзе да стварэння ў мозгу новых сувязяў і можа пасля змяніць вашы паводзіны. Не спрабуйце ставіць сабе жорсткія рамкі. Нават калі ў вас нешта не атрымліваецца, гэта не нагода пазбаўляць сябе якіх-небудзь задавальненняў ці ўводзіць радыкальныя абмежаванні.
Чаму мары не становяцца рэальнасцю?
— Мара не ператварылася ў мэту
Дакладна і зразумела для сябе самога сфармулюйце мэту, абазначце тэрміны выканання. Не варта ператвараць у мэту тое, што не залежыць ад вас, — гэта сэканоміць вам час і нервы.
— Шлях рэалізацыі не намечаны
Гэта адна з галоўных прычын, чаму мэта можа быць не дасягнута. Важна не думаць на дадзеным этапе аб магчымых рызыках і максімальна абстрагавацца ад страху перад няўдачамі.
Чытайце па тэме: Як перастаць мроіць і пачаць планаваць?
Калі мэта патрабуе дапамогі іншых людзей, шукайце паплечнікаў. Калі вы зможаце дасягнуць яе самастойна, проста акружыце сябе людзьмі, якія ў вас вераць і могуць аказаць падтрымку пры неабходнасці.
— Няма ўяўлення аб выніку — няма выніку
На жаль, часта мы цьмяна ці наогул не ўяўляем канчатковы вынік нашых жаданняў. А візуалізацыя ў гэтым працэсе грае вельмі важную ролю.
Як развіць візуалізацыю?
Самае важнае, што трэба ведаць: візуалізацыю мыслення можна развіць практычна ў любога чалавека. Усё, што для гэтага неабходна — рэгулярныя трэніроўкі для розуму і жаданне развівацца.
Найперш трэба навучыцца атрымліваць задавальненне ад самога працэсу рашэння задачы. Нават калі падчас гэтага працэсу вы сутыкаецеся з якімі-небудзь перашкодамі, проста імкніцеся атрымаць ад гэтага выгаду ці хаця б магчымасць вырашыць задачу іншым спосабам.
Для паспяховага развіцця візуалізацыі неабходна таксама рэгулярна папаўняць свае веды. Абсалютна не важна, які спосаб вы абераце: мастацкая літаратура, навуковыя артыкулы, а быць можа, паход у музей? Галоўнае — не ўпускаць ніводнай магчымасці развіваць мозг і пашыраць кругагляд.
Паспрабуйце падысці з творчага боку да вырашэння звычайных спраў. Выкарыстоўвайце звыклыя прадметы ўжытку не па прызначэнні. Часцей праяўляйце фантазію. Старайцеся фіксаваць у нататніку або ў смартфоне свае думкі, ідэі, якія выпадковым чынам узніклі ў вашай галаве.
Шукайце як мага больш арыгінальных падыходаў у вырашэнні любых задачаў. Разглядайце іх з усіх магчымых і немагчымых бакоў. Лагічна, што нашмат прасцей пайсці па ўжо вядомай дарожцы, чым выдумляць нешта новае. Бо так нібыта хутчэй, прасцей і лягчэй. Але тады паўстае пытанне: а навошта вам у такім разе наогул развіваць тую візуалізацыю?
Тэхнікі развіцця візуалізацыі
Разбярэм некалькі карысных тэхнік, якія дапамогуць развіць візуалізацыю мыслення. Асноўнае правіла для ўсіх іх простае: вылучаць на кожнае з гэтых практыкаванняў не больш за сем хвілін.
1. Напішыце апавяданне аб пустой шклянцы.
2. Успомніце пра свой самы сумны дзень у жыцці. Апішыце яго, але такім чынам, каб ваш тэкст не быў пры гэтым сумным.
3. Пачніце артыкул на 500 слоў такім першым сказам: «Калі б я мог нешта змяніць, я б змяніў...»
4. Напішыце эсэ аб тым, чаму вы не займаецеся паляпшэннем свайго жыцця кожны дзень.
5. Напішыце апавяданне пра любы прадмет сіняга колеру.
6. Уявіце, што знаходзіцеся ў пакоі, які поўны людзьмі, а вы ў ім адзін невідушчы. Запішыце, якімі вы ўяўляеце гэтае памяшканне і людзей у ім.
7. Складзіце спіс усяго, чаго баіцеся. Абярыце адзін страх і паразважайце аб ім.
8. У 200 словах апішыце спякотны дзень.
9. Што вы робіце, калі за акном кепскае надвор’е? Напішыце пра гэта апавяданне на 250 словаў.
10. Уявіце, што вы хочаце зрабіць перастаноўку ў сваёй кватэры. Падумайце над тым, як вашае жытло будзе глядзецца па-новаму. Зафіксуйце ўсе свае думкі на аркушы паперы. А калі вельмі карціць, то можаце нават паспрабаваць перайсці да дзеяння.
Не забывайце таксама, што развітая візуалізацыя мыслення істотна павялічвае прадуктыўнасць мозгу і дапамагае знайсці спосаб рашэння шматлікіх задач.
Поспехаў!
Алесь Тодараў, budzma.org
