Кожны чуў пра смачныя стравы з качкі, але мала хто гатаваў яе, затое даўно хоча гэта зрабіць. Калі вы з такіх, то дадзены рэцэпт вам прыйдзецца па смаку. Гэтую страву можна падаваць на святочны стол, а можна прыгатаваць у выходны на вячэру і здзівіць сваіх блізкіх. Тым больш гатуецца страва проста, а прадукты для яе вы дакладна знойдзеце ў крамах вашай мясцовасці.
На качку палявалі і з сабакам, і з сокалам
У часы нашых продкаў беларускія лясы былі багатыя як на звера, так і на птушку. Перадусім паляванне было заняткам шляхты і магнатаў, бо вымагала вялікіх грашовых укладанняў. Для добрага палявання быў патрэбны добры конь, абвучаныя сабакі, выкарыстоўвалі нават драпежных птушак. Буйныя страты ішлі ў дадатак на адмысловую зброю і вопратку. У паляванні шляхце дапамагалі простыя людзі, яны маглі выконваць цалкам розныя функцыі за грошы ці частку здабытай дзічыны. Сяляне «падымалі» звера ці птушку, апрацоўвалі тушы ці проста гатавалі ежу ў час перапынку паляўнічага працэсу.
Калі паляванне было на птушку, то здабычай станавіліся глушцы, цецерукі, курапаткі, перапёлкі, бакасы і канечне ж качкі. Палявалі па-рознаму: часцей за ўсё з сабакамі, папулярнымі былі літоўскія гончыя — парода ўзгадваецца ў пісьмовых крыніцах у 1541 годзе, калі ляснічы з Гродна падаў у суд з-за выкрадзенага «ганчака». Сабака знаходзіла птушку і станавілася ў адмысловую стойку, паказваючы паляўнічаму, што здабыча побач. Таксама сабакі знаходзілі і прыносілі здабытых птушак.
Значна радзей на птушку палявалі з сокаламі. Сакалінае паляванне было не толькі самым вытанчаным, але і самым дарагім. За добра навучанага сокала кароль Стэфан Баторый даваў двух скакуноў альбо трох гладкіх валоў. Драпежнік папросту лавіў дзікую птушку і прыносіў гаспадару.
Найбольш папулярнай птушкай была качка, на яе палявалі як напачатку вясны, так і ўвосень. Гэтая традыцыя стала правілам і выконваецца сумленнымі паляўнічымі па сённяшні дзень. Калі качку здабывалі ўвосень, то традыцыйна любілі яе есці пад журавінавым соусам. Бо канец лета і пачатак восені — сезон палявання не толькі на качак, але і час збіраць журавіны. Была і адамашненая качка, гатавалі дзікую і хатнюю качку амаль аднолькава, цяпер жа качку можна купіць у краме ці на рынку і не трэба ісці на паляванне.
Як прыгатаваць качыныя кумпячкі пад журавінавым соусам?
Мяса качкі адносна жорсткае, але вельмі сакавітае з-за вялікай колькасці тлушчу, які надае своеасаблівы смак і водар гатовай страве з гэтай птушкі. Лепш за ўсё браць кумпячкі, зрабіць неглыбокія надрэзы ўздоўж скуры — гэта дапаможа мяса качкі замарынаваць хутчэй і дасць натуральны тлушч, такім чынам не трэба будзе карыстацца алеем ці салам.
Для таго, каб смак мяса качкі цалкам раскрыўся, нам спатрэбяцца прынады: сумесь перцаў, крыху каляндры, духмяны перац, шчопаць кмену і лыжка солі. Усё змалоць у ступе да стану парашку. Нацерці кумпячкі з абодвух бакоў, асабліва добра ўцірайце прынаду ў надрэзы. Мяса варта пакінуць на гадзіну пры пакаёвай тэмпературы, затым паставіць на слабы агонь патэльню і выкласці качку скурай уніз. Калі ўбачыце, што качыны тлушч вытапліваецца, а скура стала залацістага колеру — такім жа чынам абсмажце адваротны бок.
Далей выкласці качыныя кумпячкі ў форму для духоўкі ці печы, нарэзаць сярэднімі кавалкамі моркву і цыбулю, можна для водару кінуць пару раздушаных зубчыкаў часнака. Дадаць гародніну ў форму і выліць туды ж тлушч з патэльні. Форму зачыніць ці запячатаць зверху фальгой. Адпраўляем страву ў печ ці духоўку на паўтары гадзіны пры тэмпературы 170 градусаў.
Пакуль мяса качкі з гарнірам гатуюцца — зробім соус. Мочаную журавіну крыху прысаліць, дадаць шчопаць перцу, лыжку мёду ці цукру, добра пратаўчы. Затым разагрэць у сатэйніку кавалак масла, уліць туды журавінавую сумесь і злёгку падварыць цягам 5 хвілін. Важна рэгулярна памешваць будучы соус. Калі астыне, то варта працерці соус праз сіта, каб скурка журавіны не патрапіла на мяса качкі пры падачы.
За 10 хвілін да гатоўнасці лепш зняць накрыўку ці фальгу з формы, дзе запякалася мяса качкі з гароднінай. Тады яно стане яшчэ больш румяным і апетытным.
Качыныя кумпячкі выкласці на талерку разам з запечанай гароднінай, паліць журавінавым соусам, і для прыгажосці можна крыху пасыпаць ірванай зелянінай.
Смачна есці!
Нам спатрэбяцца на адну порцыю:
Качыныя кумпячкі — 200 грамаў
Цыбуля — 100 грамаў
Морква — 100 грамаў
Часнок — 2 зубчыкі
Перац чорны — 5 гарошынаў
Кмен — 4 зярняткі
Перац духмяны — 2 гарошыны
Каляндра — 4 гарошыны
Соль — палова чайнай лыжкі
Соус журавінавы
Журавіны — 50 грамаў
Масла — 25 грамаў
Мёд — палова чайнай лыжкі
Соль і перац — па смаку
