Адкрыццё выставы “Васіль Быкаў. Доўгая дарога дадому…”
Пачатак: 20.06 (15:30)Канец: 20.06 (17:00)
Міністэрства замежных спраў
20 чэрвеня 2016 г. у 15.30 у Міністэрстве замежных спраў адбудзецца адкрыццё выставы Дзяржаўнага музея гісторыі беларускай літаратуры “Васіль Быкаў. Доўгая дарога дадому…”, прымеркаванай да Дня ўсенароднай памяці ахвяр Вялікай Айчыннай вайны.
Амаль 75 гадоў мінула з пачатку адной з самых разбуральных і крывавых трагедый XX стагоддзя, што бязлітасна прайшла па беларускай зямлі і забрала больш за 2 мільёны жыццяў. Да яе не рыхтаваліся, яе не чакалі… Але няма ніводнай сям’і, дзе Вялікая Айчынная вайна не пакінула б свой след. 22 чэрвеня – дзень пачатку вайны – дата трагічная і журботная, але менавіта ад яе бярэ адлік летапіс усенароднага гераізму і мужнасці. Сімвалічна, што ў гэты ж дзень 13 гадоў таму не стала чалавека, для якога вайна была часткай біяграфіі, спадарожнікам і жыцця, і творчасці – народнага пісьменніка Беларусі Васіля Быкава. Творы Васіля Быкава, праўдзівыя і шчымлівыя, нясуць энергетыку непасрэднага водгуку, экспрэсію жывога ўражання і не даюць забыць нам аб загінуўшых у баях, закатаваных у фашысцкай няволі, памерлых у тыле ад голаду і нягод.
“Васіль Быкаў. Доўгая Дарога дадому…” – гэта выставачны праект Дзяржаўнага музея гісторыі беларускай літаратуры, які арганічна раскрывае асобныя старонкі біяграфіі Васіля Быкава, знаёміць з матэрыяламі пісьменніцкага архіва.
Тэму жыццёвага і творчага шляху адлюстроўвае перасоўная літаратурна-дакументальная выстава “Васіль Быкаў. Доўгая Дарога Дадому…”, у аснову якой пакладзена апошняя прыжыццёвая кніга Васіля Уладзіміравіча. Гэта выстава дае магчымасць кожнаму сам-насам застацца з пісьменнікам, адкрыць для сябе тую спадчыну, якую ён пакінуў сваім нашчадкам.
“Дарогі Васіля Быкава” – вынік “завочнага фотапленера” — фотаздымкі мясцін, дзе пачынаўся і праходзіў жыццёвы шлях Васіля Уладзіміравіча Быкава.
Дзякуючы прадстаўленым матэрыялам наведвальнік зможа прайсці дарогамі Чалавека, філосафа, пісьменніка, грамадзяніна сваёй Бацькаўшчыны, зразумець, што было каштоўным для гэтай велічнай асобы.
У межах выставачнага праекта можна зрабіць віртуальнае падарожжа па “Музею-дачы Васіля Быкава”.
