Адкрыццё выставы “Іерусалім. Спёка і холад вечнага гораду
Пачатак: 23.06 (18:00)Канец: 23.06 (19:00)
Гарадская мастацкая галерэя твораў Л. Шчамялёва
23 чэрвеня 2021 года а 18-й гадзіне ў Гарадской мастацкай галерэі твораў Л.Д. Шчамялёва адбудзецца адкрыццё персанальнай выставы “Іерусалім. Спёка і холад вечнага гораду” вядомага віцебскага мастака-манументаліста Васіля Васільева у рамках рэспубліканскага фестывалю манументальнага мастацтва “МАНУМЕНТ” Беларускага саюза мастакоў. Праект падрыхтаваны секцыяй манументальна-дэкаратыўнага мастацтва Беларускага саюза мастакоў.
У экспазіцыі выставы “Іерусалім. Спёка і холад вечнага гораду” прадстаўлена серыя з 14 маштабных жывапісных работ Васіля Васільева, якія адсылаюць да падзей, апісаных у Бібліі. Мастак не ілюструе святыя тэксты, ён спрабуе асэнсаваць выяўлены ў біблейскай гісторыі агульначалавечы і, разам з тым, індывідуальны вопыт.
Васіль Васільеў: “Для мяне праект стаў важнай размовай аб Вечным – аб жыцці і смерці, каханні, цярпенні, надзее, здрадзе і адданасці. Біблейскія сюжэты, убачаныя нейкім унутраным зрокам, увасабляліся ў эскізах, над якімі я працаваў у мінулым годзе. А вось карціны былі завершаны ўжо ў пачатку 2021 года”.
Гэта канцэптуальны мастацкі праект на біблейскую тэматыку, які не мае адносіны да канону рэлігійнага мастацтва, такой і была першапачатковая задума аўтара. Манументальныя палотны “Ты сказаў”, “Абмыванне рук”, “Тайная вячэра”, “Уваход Гасподні ў Іерусалім” і іншыя карціны – свецкі жывапіс, ён не з'яўляецца ілюстрацыяй да біблейскага тэксту, які стаў для мастака “крыніцай паэзіі”.
Часткова выстава была прэзентавана ў Віцебску ў Арт-цэнтры Марка Шагала. І невыпадкова. У свой час Марк Шагал зазначаў, што лічыць Біблію галоўнай крыніцай паэзіі на Зямлі, і, як многія мастакі, звяртаўся да сюжэтаў Кнігі кніг, стварыў графічныя і жывапісныя работы да Старога Запавету. А вось Васіль Васільеў зрабіў цыкл работ на сюжэтны шэраг Новага Запавету.
Да біблейскіх сюжэтаў Васіль Васільеў звяртаўся ў розныя перыяды творчасці. З гэтай тэмай была звязана абарона яго дыплома ў Беларускай дзяржаўнай акадэміі мастацтваў. У той жа час ён атрымаў заказ на 12 абразоў для іканастаса царквы Уваскрэсення ў Дзісне. Так што размова з Вечнасцю для мастака не спынялася...
Выстава працягнецца да 18 липеня 2021 года.
ВАСІЛЬ ВАСІЛЬЕЎ
Кароткая біяграфія:
Нарадзіўся ў 1954 годзе ў Оршы.
У 1982 годзе скончыў мастацка-графічны факультэт Віцебскага дзяржаўнага педагагічнага інстытута, пазней, у 1992 годзе – аддзяленне манументальна-дэкаратыўнага мастацтва Беларускай дзяржаўнай акадэміі мастацтваў.
Старшы выкладчык (1992), дацэнт кафедры дызайну Віцебскага дзяржаўнага тэхналагічнага ўніверсітэта (1998).
З 1993 года з'яўляецца сябрам Беларускага саюза мастакоў.
У якасці аўтара і куратара Васіль Васільеў удзельнічае ў розных калектыўных канцэптуальных праектах. Працуе з мастацтвам «аб'екта», стварае інсталяцыі, кампазіцыі ў галіне «лэнд-арту».
Творы мастака знаходзяцца ў фондах Беларускага саюза мастакоў, Полацкай мастацкай галерэі, Мастацкім музеі Віцебска.
